Сокинони Тоҷикистон наметавонанд гирифти пурраи навбатии Офтобро, ки имрӯз сурат мегирад, мушоҳида кунанд

Декабрь 14, 2020 11:10

ДУШАНБЕ, 14.12.2020 /АМИТ «Ховар»/. Имрӯз, 14 декабр, соати 14:13 ба вақти маҳаллӣ гирифти (кусуфи) пурраи  офтоб сурат  хоҳад гирифт, аммо сокинони Тоҷикистон ин рӯйдоди астрономиро наметавонанд мушоҳида кунанд. Сабаби ин на шароити обу ҳаво — абрнокӣ ва тумани шадид, балки мавқеи ҷуғрофӣ мебошад. Дар ин бора ба мухбири АМИТ «Ховар» директори Пажӯҳишгоҳи астрофизикаи Академияи миллии илмҳои Ҷумҳурии Тоҷикистон Гулчеҳра Қоҳирова иттилоъ додааст.

Ба гуфтаи вай, сокинони Чилӣ ва Аргентина метавонанд ҳалқаи оташин ё «тоҷи хуршедиро» дар атрофи Моҳ бубинанд, ки қурси Офтобро пурра мепӯшонад ва қисман дар Амрикои Ҷанубӣ, Полинезия, Антарктида ва Африка ин рӯйдод мушоҳида хоҳад шуд. Давомнокии гирифти имрӯзаи Офтоб 2 дақиқаю 10 сония хоҳад буд.

Тавре ки Гулчеҳра Қоҳирова иброз дошт, бори охир чунин гирифти Офтоб соли 2002 рух дода буд.

Вай иттилоъ дод, ки гирифти Офтоб падидаи маъмули астрономӣ буда, танҳо бо ҳаракати Замин, Моҳ ва Офтоб дар фазои кайҳонӣ бастагӣ дорад. Гирифти Офтоб на ба саломатии инсон ва на ба ҳаёти рӯзмарраи ӯ зарар намерасонад. Мушоҳидаҳои дарозмуддат нишон доданд, ки ҳангоми гирифти Офтоб ва пас аз он ягон омили барои инсон зараровар сабт нашудааст. Бинобар ин, дар ҷараёни чунин падидаи астрономӣ, албатта, одамон метавонанд тарзи ҳаёти маъмулии худро идома диҳанд ва ба ҳар гуна пешгӯиҳои зиддиилмӣ бовар накунанд.

Бояд зикр кард, ки гирифти Офтоб рӯйдоди астрономӣ мебошад — яъне вақте ки Моҳ Офтобро пурра ё қисман мепӯшонад (мегирад). Гирифти Офтоб танҳо ҳангоми ҳилоли моҳ (нав будани моҳ) имконпазир аст, ин ҳамон марҳилаи моҳ аст, ки тарафи ба Замин нигаронидашудаи Моҳ равшан нест ва худи Моҳ аз рӯи Замин мушоҳида намешавад. Илова бар ин зарур аст, ки тулӯи моҳи нав дар наздикии яке аз ду нуқтаи буриши мадорҳои намоёни Моҳ ва Офтоб рух бидиҳад. Бинобар ҳамин шароит, рӯйдоди гирифти Офтоб зуд-зуд ба амал намеояд. Дар тӯли сол дар Замин аз 2 то 5 рӯйдоди гирифти Офтоб метавонад рух бидиҳад.

Декабрь 14, 2020 11:10

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад