Тақозои Раёсати Хадамоти давлатии оташнишонии Бадахшон аз тоҷирон: «Неруи барқро оқилонаву сарфаҷӯёна истифода баред!»

Декабрь 18, 2020 09:07

ХОРУҒ, 18.12.2020 /АМИТ «Ховар»/. Кормандони Раёсати Хадамоти давлатии оташнишонии Вилояти Мухтори Кӯҳистони Бадахшон вазъи истифодаи оқилонаи неруи барқ ва роҳҳои пешгирӣ аз сӯхторро дар баъзе ошхонаву дӯконҳо ва марказҳои хизматрасонии бозори марказӣ  мавриди санҷиш қарор доданд. Натиҷаи санҷиш нишон дод, ки баъзе  марказҳои хизматрасонии маишӣ ва тиҷоратӣ на танҳо одитарин қоидаҳои бехатарӣ аз сӯхторро риоя намекунанд, балки ҳангоми истифода аз неруи барқ ба исрофкорӣ роҳ медиҳанд.

Аъзои гурӯҳи корӣ зимни суҳбат бо соҳибкорони бозори марказӣ ва дӯкону мағозаҳои атрофи он изҳор доштанд, ки «ҳаргиз нияти халалдор кардани фаъолияти онҳоро надоранд, баръакс мехоҳанд тиҷораташон боз ҳам равнақ ёбад. Танҳо ягона тақозояшон ин аст, ки неруи барқро оқилонаву сарфаҷӯёна истифода баранд».

Танҳо ба ин восита ширкати «Помирэнерҷӣ» имконият пайдо мекунад, ки маҳдудияти истифодаи неруи барқро аз байн бардорад.

Сардори Раёсати Хадамоти давлатии оташнишонии вилоят Ҷаъфари Ризо гуфт, ки “ба сабаби кам шудани сатҳи оби дарёи Ғунд ва яхбандии аз меъёри зиёд дар ҳавзи нигоҳдории об тавлиди неруи барқ каме коҳиш ёфт. Аммо сарфи назар аз ин мушкилоти табиӣ сокинони шаҳри Хоруғ, тамоми идораву муассисаҳо ва марказҳои тиҷоратӣ 24 соат бо неруи барқ таъмин мебошанд. Танҳо ба баъзе аз деҳоти дурдасти ноҳияҳои вилоят барқ мутобиқи реҷа дода мешавад. Агар сокинони шаҳр ва корхонаву муассисаҳои ҳудуди шаҳр, бахусус ҳаммому нонвойхона ва ошхонаву тарабхонаҳо оқилонаву сарафакорона аз неруи  барқ баҳра баранд ва ба ҷои барқ аз ангишти табиӣ  истифода кунанд, он вақт имкони пурра бо барқ таъмин намудани тамоми сокинони вилоят пайдо хоҳад шуд”.

Ба гуфтаи сардори Раёсати Хадамоти давлатии оташнишонии вилоят, ҳамчунин  нодуруст пайваст кардани ноқилҳои барқӣ, истифодаи бухориҳои барқии худсохту ғайристандартӣ ва ё асбобе, ки ноқилҳояшон ба ҳисобкунакҳо пайваст нашудаанд, на танҳо  сӯхтор ба амал меоранд, балки боиси аз меъёри муқаррарӣ зиёд истифода бурдани  неруи  барқ мегарданд.

Тоҷирону соҳибкорони бозори марказии шаҳри Хоруғ баъди ин суҳбату мулоқот ваъда доданд, ки рӯзҳои наздик тамоми нуқсу камбудиҳои ошкоршударо ислоҳ хоҳанд кард.

Декабрь 18, 2020 09:07

Хабарҳои дигари ин бахш

Байни Тоҷикистон ва Қирғизистон Ёддошти тафоҳум оид ба ҳамкорӣ дар соҳаи иҷтимоӣ ба имзо расид
ИМРӮЗ — РӮЗИ МАЪЮБОН. Дар Тоҷикистон заминаи ҳуқуқии ҳифзи иҷтимоии маъюбон фароҳам оварда шудааст
Пагоҳ дар баъзе аз кӯчаҳои Душанбе ҳаракати воситаҳои нақлиёт муваққатан қатъ мегардад
Дар Душанбе вобаста ба ҳимояи ҳуқуқи инсон дар шароити рақамикунонӣ ҳамоиш баргузор шуд
Гурӯҳи корӣ бо рафти корҳои сохтмонии манзилҳои аз офати табиӣ зарардидаи ноҳияҳои Рашт ва Тоҷикобод шинос гардид
Дар Тоҷикистон доир ба пардохти кумакҳои унвонии иҷтимоӣ давраи омӯзишӣ ҷараён дорад
Гармии шадиди ҳаво боиси авҷи кадом бемориҳо мегардад?
Басти дуюми истироҳатгоҳи «Файзи истиқлол» дар ноҳияи Варзоб оғоз гардид
Чӣ тавр худро аз гармии тобистон муҳофизат кунем? Донистани роҳҳои дурусти он муҳим аст
Дар дарёи Ёхсу корҳои соҳилмустаҳкамкунӣ ҷараён доранд
Огоҳӣ! Дар Тоҷикистон ҳавои гарму хушк пешгӯӣ мешавад
Ҷавонони тоҷик дар Форуми ҷавонони Созмони ҳамкории иқтисодӣ иштирок намуданд