Вазорати мудофиаи ҶИА аз маҳви 26 толиб ва 4 ҷангҷӯи «Ал-Қоида» дар Ҳилманд хабар дод

ДУШАНБЕ, 28 декабр. /АМИТ «Ховар»/ Рӯзи шанбе, дар натиҷаи ҳамлаи ҳавоӣ дар вилояти ҷанубии Афғонистон Ҳилманд 15 толиб ва 4 ҷангҷӯи «Ал-Қоида» (дар қаламрави Тоҷикистон мамнӯъ аст) маҳв шуданд, хабар медиҳад Афганистан.ру. бо истинод ба вазорати мудофиаи Афғонистон.

Тибқи ин гузориш, бомбаборони ҳавоӣ дар ноҳияи Наво сурат гирифтааст. Вазорати мудофиаи ҶИА таъкид кардааст, ки ба ҷангҷӯён замоне зарба зада шуд, ки онҳо ба гузоштани минаҳо машғул буданд.

Илова бар ин, дар ҳамлаи ҳавоии дирӯза дар вилояти мазкур 11 ҷангҷуйи дигари “Толибон” кушта ва чаҳор нафар маҷрӯҳ шуданд.

Намояндагони ҷунбишҳои радикалӣ то ҳол маълумотро дар бораи талафот дар сафҳояшон шарҳ надодаанд.

Дар ҳамин ҳол, Идораи амнияти миллии ҶИА аз боздошти як ҷангҷӯйи “Ал-Қоида” дар Заранҷ, маркази вилояти ҷанубу ғарбии Афғонистон Нимрӯз хабар дод. Дар гузориш қайд шудааст, ки боздоштшуда дар ҳамла ба неруҳои амниятӣ дар вилоят даст дорад.