Дар Суғд Фестивали вилоятии заргарӣ таҳти унвони «Ҳунар омӯз…» доир мешавад

ДУШАНБЕ, 27.01.2021 /АМИТ «Ховар»/. Бахшида ба Солҳои рушди деҳот, сайёҳӣ ва ҳунарҳои мардумӣ дар вилояти Суғд Фестивали вилоятии заргарӣ таҳти унвони «Ҳунар омӯз…» доир карда мешавад.

Тавре аз хадамоти матбуоти Раиси вилояти Суғд ба АМИТ «Ховар» иттилоъ доданд, фестивали мазкур бо мақсади тарбияи ҳисси зебоипарастӣ, хештаншиносӣ, ҳунармандӣ, ватандӯстӣ, эҳёи анъанаҳои миллӣ ва оммавӣ гардонидани суннатҳои беҳтарини заргарии миллӣ, тарғибу ташвиқи арзишҳои фарҳанги заргарӣ, арҷгузорӣ ба меҳнати истеҳсолкунандаи маснуоти заргарӣ ва муаррифии навъҳои гуногуни заргарии миллӣ гузаронида мешавад. Озмун дар 2 давр: шаҳру ноҳияҳо ва вилоятӣ доир гардида, ғолибон  бо диплому мукофотпулиҳои мақомоти иҷроияи ҳокимияти давлатии вилояти Суғд қадрдонӣ карда мешаванд.

Ёдовар мешавем, ки  Фестивали заргарӣ таҳти унвони «Ҳунар омӯз…» дар асоси банди 1-уми Амри Президенти Ҷумҳурии Тоҷикистон аз 13 декабри соли 2018 баҳри эҳё ва рушди соҳаи заргарии миллӣ, коркарди сангҳои ороишию қиматбаҳо ва омезиши онҳо бо дастовардҳои давлатҳои пешрафта тайи чанд соли охир аст, ки дар шаҳру ноҳияҳо, ҷамоатҳои шаҳраку деҳот, деҳа ва маҳаллаҳои вилояти Суғд доир карда мешавад.

Акс аз бойгонии АМИТ «Ховар»