Сокини шаҳри Левакант Қиëмидин Муъминов беш аз 3000 навъи гуногуни дарахти пистаро аз хориҷи мамлакат ворид намуд

Январь 23, 2021 10:02

ДУШАНБЕ, 23.01.2021. /АМИТ «Ховар»/.  Дар деҳаи Сарбанди Ҷамоати деҳоти Ваҳдати шаҳри Леваканти вилояти  Хатлон боғпарвар Қиëмидин Муъминов беш аз 3000 навъҳои гунони дарахти пистаро аз хориҷи мамлакат ворид намуда, дар гармхона парвариш менамояд. Дар ин бора хабарнигори АМИТ «Ховар» бо истинод ба маркази матбуоти раиси шаҳри Левакант иттилоъ медиҳад.

Ба гуфти Қиëмидин Муъминов, навъҳои пистаи вориднамудааш тез боровар шуда, ҳосили фаровон медиҳанд. Инчунин шароити табиии Тоҷикистон   имкон  медиҳад, ки талаботи дохилӣ бо навъу шаклҳои тухмии пурарзиши писта таъмин ва тухмӣ барои фурӯш ба берун аз  ҷумҳурӣ низ бароварда шавад.

Мавриди зикр аст,  ки дар минтақаи ҷанубӣ, хусусан шаҳру ноҳияҳои  Хуросон, Қубодиён, Шаҳритус, Бохтар, Левакант, Данғара, Панҷ, Фархор ва Темурмалик пистазорон домани фарох густурдаанд, вале ҳанӯз ҳам имконияти мавҷуда ба таври дилхоҳ истифода нашудаанд.

Тибқи хулосаи коршиносон, дар баробари мутобиқати иқлим пистаи дар минтақаҳои кӯҳии вилояти Хатлон парваришёфта нисбат ба  маҳсулоти воридотии он  сифати беҳтар дорад.  Агар  таркиби пистаи воридотӣ 47 дарсад равған дошта бошад, пас дараҷаи равғаннокии пистаҳои маҳаллӣ ба 67 дарсад мерасад.

Пистаи маҳаллӣ  равғаннокии  зиёд дошта, болаззаттар  аст.  Дар хоҷагиҳои ҷангал барои васеъ  намудани майдони пистазор аз тухмиҳои босифату донакалони  ба маҳал мутобиқ  истифода бурда мешавад. Инчунин пистаи маҳаллӣ   хосияти донакалонӣ, кушодашавии дона на камтар аз 75 дарсад, ҳосилнокии баланди муътадил, равғаннокии зиёда аз  67 дарсад дошта, ба касалию ҳашарот ва гармӣ тобовар мебошад

Бояд гуфт, ки хусусияти хоси биологию экологии писта, ба шароити гармиҳои хушк ва сардиҳои баланд тобовар будан имкон  медиҳад, ки майдонҳои зиёд барои бунёду парвариши боғҳои саноатии писта аз худ карда шуда, ба тараққиёти соҳаи пистапарварӣ дар Тоҷикистон ва баланд бардоштани некуаҳволии аҳолии ин  минтақаҳои пистапарварӣ мусоидат намоянд.

Дарахти писта дар кӯҳсор, саҳроҳои пуштазамин ва ғайра месабзад.

Хусусиятҳои шифобахшии писта инҳоянд: мағзи самарашро бихӯранд, зеҳнро тез мегардонад, ҳолати майнаро сара нигоҳ медорад; сурфа, дилтапак (дилбозӣ), қай, беҳузур (беҷо) шудани дил, дарди рӯдаҳо ва сардии ҷигарро дафъ мекунад. Писта ҳамчун ғизо камқувват аст, вале агар инро бардавом бихӯранд, баданро фарбеҳ мекунад.

Январь 23, 2021 10:02

Хабарҳои дигари ин бахш

Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст
Рақамикунонии соҳаи замин дар Тоҷикистон бо ҳайати Бонки рушди Осиё баррасӣ шуд