Ба роҳ мондани истеҳсоли саноатии дастгоҳи худсози нафасдиҳии сунъӣ дар Тоҷикистон имконпазир аст

ДУШАНБЕ, 15.02.2021 /АМИТ «Ховар»/. Барои мубориза бо  бемории сироятии COVID-19 олимони Академияи миллии илмҳои Тоҷикистон дастгоҳи худсози нафасдиҳии сунъӣ ихтироъ намуданд. Дастгоҳ дар асоси тарҳи электронии таҳиянамудаи олимони соҳаи физика сохта шуда, дар беморхонаи клиникии шаҳрии ёрии таъҷилӣ аз озмоиш гузаштааст. Ин нуктаро имрӯз Президенти Академияи миллии илмҳои Тоҷикистон Фарҳод Раҳимӣ зимни нишасти матбуотӣ оид ба натиҷаҳои соли гузаштаи фаъолияти АМИТ ба хабарнигорон иброз намуд.

Ба зикри мавсуф, ба роҳ мондани истеҳсоли саноатии дастгоҳи худсози нафасдиҳии сунъӣ дар Ҷумҳурии Тоҷикистон ҳамчун дастгоҳи тиббии воридотивазкунанда имконпазир мебошад.

«Академияи миллии илмҳои Тоҷикистон бо истифода аз имконоти дохилӣ аз 28 феврали соли 2020 ба истеҳсоли маводи гипохлорити натрий, ки дар ҳама давлатҳои дунё ҳамчун маводи маъмули антисептикӣ барои безараргардонии вирусҳо васеъ истифода бурда мешавад, шурӯъ намуд. Илова бар ин бо усули электролиз истеҳсоли оби нуқра ба роҳ монда шудааст. Бояд зикр намуд, ки нанозарраҳои нуқра хусусияти зиддимикробӣ дошта, маводи хеле самараноки безараркунандаи вирусҳо ба шумор мераванд. Таъсири безараргардонии онҳо ба зиёда аз 650 намуди бактерияҳо исбот гардидааст. Илова ба ин, ионҳои нуқра масунияти организмро баланд ва хавфи сироят ёфтан аз бемориҳои сирояткунандаро маҳдуд мегардонанд»,- гуфт Фарҳод Раҳимӣ.

Ба зикри  Президенти Академияи миллии илмҳои Тоҷикистон, айни замон аз ҷониби АМИТ истеҳсоли оби нуқра ба сифати маводи зиддивирусӣ барои истифода бурдан дар ниқобҳои муҳофизатӣ пешниҳод мешавад.

Олимони АМИТ дар натиҷаи омӯзиши хосиятҳои шифобахшии растании камоли тоҷикон собит намуданд, ки шира ва решаи ин растаниро ҳамчун маводи фаъоли биологӣ барои қавӣ гардонидани масъунияти бадан истифода бурдан мумкин аст.

Айни замон олимони Академияи миллии илмҳо дар ҳамкорӣ бо Муассисаи давлатии «Пажӯҳишгоҳи гастроэнтерология» якчанд иловаҳои фаъоли биологӣ, аз қабили «Камолид», «Камолин», «Мукофер», «Седармон», малҳамҳои «Проктоферуол», «Херболит» ва «Ҳербитол»-ро таҳия намудаанд, ки ба роҳ мондани истеҳсоли онҳо дар саноати дорусозии ватанӣ метавонад ҳамчун маводи воридотивазкунанда ҷои баъзе иловаҳои фаъоли биологиро, ки аз хориҷи мамлакат ворид мешаванд, гирад. Ҳамчунин аз растании явшон (ҷорубак) маводи фаъоли биологие дар шакли маҳлул ва қиём тайёр карда шудааст, ки хусусияти зиддибактериявӣ ва зиддивирусӣ дорад.