«Бобоҷон Ғафуров — муаррихи Машриқзамин»- таҳти ин унвон дар Осорхонаи миллии Тоҷикистон намоишгоҳ ифтитоҳ гардид

Февраль 6, 2021 10:10

ДУШАНБЕ, 06.02.2021 /АМИТ «Ховар»/. 5 феврал дар  Осорхонаи миллии Тоҷикистон бахшида ба 30-солагии Истиқлоли давлатии Ҷумҳурии Тоҷикистон ва бузургдошти фарзанди фарзонаи миллат, ходими номдори давлатию сиёсӣ, Қаҳрамони Тоҷикистон, академик Бобоҷон Ғафуров таҳти унвони «Бобоҷон Ғафуров-муаррихи Машриқзамин» намоиши ҷумҳуриявӣ ифтитоҳ гардид, ки то 10 март идома меёбад.

Тавре сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷазода ба мухбири АМИТ «Ховар»  хабар дод, зимни ифтитоҳи намоиш намояндагони Вазорати фарҳанги Ҷумҳурии Тоҷикистон, Академияи миллии илмҳои Ҷумҳурии Тоҷикистон, Китобхонаи миллии Тоҷикистон, инчунин устодон ва донишҷӯёни Донишгоҳи миллии Тоҷикистон, Донишгоҳи давлатии омӯзгории Тоҷикистон, Донишкадаи давлатии фарҳанг ва санъати Тоҷикистон, Донишгоҳи славянии Россияву Тоҷикистон иштирок намуданд.

Директори Осорхонаи миллии Тоҷикистон Аҳлиддин Ибодуллозода  зикр намуд, ки «мо ҳоло шоҳиди иқдоми навбатии наҷиби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ба ҳар оилаи мамлакат тақдим намудани китоби «Тоҷикон»-и Бобоҷон Ғафуров гардидаем. Дар фонди Осорхонаи миллии Тоҷикистон якчанд ордену медалҳо, ҳуҷҷатҳо, аксҳо, туҳфаҳо ва дигар ашёи осорхонавии марбут ба фаъолияти ин шахсияти зиндаёди миллати тоҷик ҳифз карда мешаванд. Дар робита ба ин, имрӯз мо тасмим гирифтем, ки ин маводи таърихӣ ва осорхонавиро ба муносибати 30-солагии Истиқлоли давлатии Ҷумҳурии Тоҷикистон ба намоиш гузорем».

Дар намоиш аз фонди Осорхонаи миллии Тоҷикистон 110 адад нигора, аз қабили мусаввара, ордену медалҳо, диплому сипосномаҳо, ҷоизаҳо, мукофотҳои давлатӣ, ҳуҷҷату аксҳо ва китобҳо пешниҳод шудаанд, ки фаъолияти пурсамари Бобоҷон Ғафуров ва саҳми боризи ӯро дар арсаи ҷаҳонӣ нишон медиҳанд.

Дар намоишгоҳ  китоби тозанашри Бобоҷон Ғафуров- «Тоҷикон», аксҳо аз ҷараёни иштирок ва суханрониҳои Бобоҷон Ғафуров дар якчанд конференсияҳои байналмилалӣ, аз ҷумла дар Югославия (1960), Ироқ (1969), Ленинград (1972) ва Калкутта (1974) пешниҳоди тамошобинон гардонида шудаанд. Инчунин мукофотҳои баланди давлатии мавсуф- шаш ордени Ленин, ордени Байрақи Сурхи Меҳнат ва чандин медалу нишонҳо ба маърази тамошо гузошта шудаанд.

Ҳамчунин дар қисмате аз намоиш диплому сипосномаҳо ва грамотаҳои фахрӣ, шаҳодатномаҳо, ҷоиза ва мукофотҳои давлатӣ, китобҳо мансуб ба аллома Бобоҷон Ғафуров пешниҳод шудаанд, ки аҳамияти таърихӣ ва тарбиявӣ дошта, аз фаъолият ва дастовардҳои пурсамари устод қисса менамоянд.

Дар маркази намоишгоҳ тавассути оинаи нилгун филми мустанад доир ба фаъолияти аллома Бобоҷон Ғафуров манзури тамошобинон гардонида шудааст.

Февраль 6, 2021 10:10

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд
Намояндаи Тоҷикистон дар ҳамоиши тарғибгарони илм дар Чин иштирок намуд