Донишгоҳи миллии Тоҷикистон аз аккредитатсияи инстутсионалии аврупоӣ пурра гузашт

ДУШАНБЕ, 02.02.2021 /АМИТ «Ховар»/. Донишгоҳи миллии Тоҷикистон аввалин муассисаи таҳсилоти олии касбии  Тоҷикистон маҳсуб меёбад, ки аз аккредитатсияи инстутсионалии аврупоӣ  пурра гузашт  ва мақоми худро боз ҳам мустаҳкам намуд. Дар ин бора имрӯз Ректори Донишгоҳи миллии Тоҷикистон Қобилҷон Хушвахтзода ба хабарнигорон зимни нишаст иттилоъ дод.

Қобилҷон Хушвахтзода афзуд, ки 2 ва 15 ноябри соли 2020 гурӯҳи коршиносони байналмилалӣ ба ДМТ ташриф оварда, бо тамоми паҳлуҳои  донишгоҳ шинос шуданд. Онҳо донишгоҳи моро дар қиёс ба талаботи аврупоӣ пурра мавриди санҷиш қарор доданд.

«Имрӯз, хушбахтона, пас аз омӯзиш ва пешниҳоди тамоми ҳуҷҷатҳои дахлдор Шӯрои агентии сифати таҳсилоти олии касбӣ дар Эстония (EKKA) Донишгоҳи миллиро мувофиқ ба талабот ва стандартҳои аврупоӣ эътироф намуд»,-зикр кард мавсуф.

Ин дар ҳолест, ки 1 сентябри соли 2019 Пешвои миллат муҳтарам Эмомалӣ Раҳмон зимни ифтитоҳи бинои Академияи давлатии идоракунии назди Президенти Ҷумҳурии Тоҷикистон ва Дарси сулҳ ба муассисаҳои таҳсилоти олии касбӣ дастур дода буданд, ки донишгоҳҳо ва донишкадаҳо аз аккредитатсияи  байналмилалӣ гузаранд ва мавқеи касбии таҳсилоти олии Тоҷикистонро дар минтақа ва ҷаҳон муаррифӣ намоянд.

Ректори донишгоҳ иброз кард, ки EKKA аккредитатсияи муассисаҳои таҳсилоти олии касбӣ ва баҳодиҳии сифати барномаҳои таълимиро дар Эстония ва дигар давлатҳои хориҷӣ анҷом медиҳад. Аз соли 2013 EKKA ба регистри аврупоии таъмини сифати таҳсилоти олӣ ворид карда шудааст. Он узви Ассотсиасияи аврупоии таъмини сифати таҳсилоти олӣ, Шабакаи  байналмилалии Агентии оид ба таъмини сифати таҳсилот, Шабакаи агентиҳои марказӣ ва шарқии таъмини  аврупоии сифати таҳсили касбӣ мебошад.