Кишоварзони Ховалинг дар 3 ҳазору 524 гектар зироати тирамоҳии ғалладонагӣ кишт намудаанд

ХОВАЛИНГ, 13.02.2021 /АМИТ «Ховар»/. Кишоварзони ноҳияи Ховалинг бо истифода аз обу ҳавои мусоид ва тавсияи мутахассисони соҳа дар 3 ҳазору 524 гектар заминҳои корами лалмӣ зироати тирамоҳии ғалладонагӣ кошта, нақшаи дурнаморо ба андозаи 100 фоиз таъмин намудаанд.

Тавре мухбири минтақавии АМИТ “Ховар” хабар медиҳад, дар айни замон дар ноҳия дар ҳамаи шаклҳои хоҷагидорӣ 132 адад техникаҳои кишоварзӣ дастраси деҳқонон буда, дар ҳолати корӣ қарор доранд. Чанд рӯзи беборишу офтобии моҳи феврал барои  вусъати корҳои саҳроӣ дар ин ноҳияи кӯҳистон мусоидат намуд. Деҳқонон бо мақсади омода сохтани заминҳои кишт техникаҳоро ба саҳро бароварданд.

Тавре  муовини аввали раиси ноҳия Саймумин Рауфзода иттилоъ дод, дар кишти баҳорӣ дар ноҳияи Ховалинг вобаста ба иқлим зироати ғалладонагию лубиёгӣ, сабзавоту полезӣ ва дар майдони 400 гектар картошка кишт менамоянд.

Кишоварзони ноҳия тасмим гирифтаанд, ки имсол бо истифода аз талу теппаҳо ва заминҳои наздиҳавлигӣ кишту парвариши ҳама гуна маҳсулоти кишоварзиро нисбат ба нақшаи дурнамо зиёд намоянд. Барои  амалӣ  кардани ин иқдом аз ҳоло бо захира намудани қисмҳои эҳтиётии техника, тухмиҳои хушсифати ба шароити иқлими минтақа мутобиқ ва равғанҳои молиданию маводи сӯхт замина гузошта истодаанд.