Равшанбек Собиров мушовири президенти Қирғизистон таъйин шуд

ДУШАНБЕ, 08.02.2021 /АМИТ «Ховар»/. Содир Жапаров фармоне имзо кард, ки тибқи он Собиров Равшанбек Азатович мушовири Президенти Ҷумҳурии Қирғизистон таъйин карда шуд. Тавре АМИТ «Ховар» хабар медиҳад, фармони мазкур 5 феврал дар сомонаи Президенти Ҷумҳурии Қирғизистон нашр шудааст.

Қаблан Равшанбек Собиров ба ҳайси муовини сарвазир кор мекард ва масъалаҳои рушди минтақа, бахши воқеӣ ва инфрасохторро сарпарастӣ мекард. Пас аз ташкили Девони нави вазирон вазифаи муовини сарвазир бекор карда шуд.

Равшанбек Собиров 51 сол дошта, дар ноҳияи Қаросӯи вилояти Ӯш дар оилаи тоҷик таваллуд шудааст. Аз моҳи августи соли 2008 ӯ роҳбари Ассотсиатсияи тоҷикони Қирғизистон ба номи Абӯабдуллоҳи Рӯдакӣ мебошад.

Фаъолияти меҳнатӣ:

1986 — коргари бригадаи истеҳсолии №1 дар совхози «Қирғизистон»-и ноҳияи Қаросӯ;

1990 — коргари ҶСК «Қирғизистон»;

1996 — соҳибкори хусусӣ;

2001-2010 — Директори генералии ҶДММ «Наар»;

2004-2010 — Директори Маҷмааи савдо ва бозорҳои «Кербен»;

2009 — узви Палатаи ҷамъиятии Ҷумҳурии Қирғизистон;

Апрел — ноябри соли 2010 — муовини раиси Ассамблеяи халқҳои Қирғизистон;

Майи 2010 — узви Шӯрои машваратӣ оид ба робита бо ҷомеа;

Ноябри 2010 — декабри 2011 — вакили Жогорку Кенеш;

2011-2012 — Вазири рушди иҷтимоии Ҷумҳурии Қирғизистон;

14 октябри соли 2020 муовини сарвазири Қирғизистон таъйин шуда буд.

                                           АКС аз бойгонӣ