Артиши миллии Афғонистон дар натиҷаи як амалиёт се маргталабро маҳв ва ҳафт нафари дигарашро захмӣ намуд

ДУШАНБЕ, 10.03.2021 /АМИТ «Ховар»/ Вазорати дифои Афғонистон эълом кардааст, ки 10 маргталаби гурӯҳи «Толибон» ва автомашинаи пур аз маводи таркандаи онҳо дар вулусволии Алмори вилояти Форёб ҳадафи ҳамлаи Артиши миллии Афғонистон қарор гирифтанд, хабар медиҳад АМИТ «Ховар» бо истинод ба агентии иттилоотии Khaama Press.

Вазорат имрӯз, 10 март хабар додааст, ки «Толибон» (мамнӯъ дар Тоҷикистон) тасмим гирифта буданд, ки шаби гузашта бо як автомашинаи пур аз маводи тарканда ба неруҳои дифоӣ ва амниятӣ дар ноҳияи Алмори вилояти Форёб ҳамла кунанд.

Дар хабар омадааст, ки низомиён мошини муҷаҳҳаз бо маводи таркандаи «Толибон»-ро ҳадафи ҳамлаи худ қарор доданд ва  дар натиҷа се маргталаб кушта ва ҳафт нафари дигари онҳо захмӣ шуданд.

Ҳамчунон 8 март неруҳои амниятӣ ва дифоӣ бо дастгирии қувваҳои ҳавоӣ ҷангҷӯёни «Толибон»-ро дар атрофи маркази вулусволии Алмори вилоят ҳадаф қарор доданд, ки дар натиҷа 12 тани онҳо кушта ва чаҳор нафари дигар маҷрӯҳ шуданд.

Вилояти Форёб дар шимоли Афғонистон ҷойгир аст ва яке аз минтақаҳои ноамн дар кишвар мебошад ва «Толибон» дар вулусволиҳои он, хусусан дар Алмор, ҳузури зиёд доранд.