Шумораи қурбониёни таркиш дар Ҳироти Афғонистон ба 8 нафар расид

ДУШАНБЕ, 13.03.2021 /АМИТ «Ховар»/. Шумораи қурбониёни таркиши мошини муҷаҳҳаз бо маводи тарканда дар ноҳияи 14-и шаҳри Ҳироти Афғонистон ба ҳашт нафар расида, на кам аз 60 тани дигар захмӣ шудаанд. Дар ин бора АМИТ «Ховар» бр истинод ба шабакаи телевизионии «Тулӯъ нюс» хабар медиҳад.

Ба иттилои волии вилоят Воҳид Каталӣ, ҳамла дар наздикии посгоҳи полис дар ноҳияи 14-уми Ҳирот шоми рӯзи ҷумъа рух додааст.

Мақомоти маҳаллӣ гуфтанд, ки ҳафт нафар аз қурбониён ғайринизомиён мебошанд.

«Дар натиҷаи таркиш беш аз даҳ хона осеб дидаанд», — омадааст дар иттилоияи полиси Ҳирот.

Шоҳидон гуфтанд, ки аксари захмиён кӯдакон буданд.

Ҳеҷ гурӯҳе масъулияти ин ҳамларо то ҳол бар дӯш нагирифтааст.