Тоҷикистон ба нақша гирифтааст, ки то соли 2023 содироти сементро ба 1,9 млн тонна расонад

ДУШАНБЕ, 16.03.2021 /АМИТ «Ховар»/. Тоҷикистон ба нақша гирифтааст, ки то соли 2023 содироти сементро ба 1,9 млн тонна расонад. Тавре  дар дурнамои нишондиҳандаҳои асосии макроиқтисодии Ҷумҳурии Тоҷикистон барои солҳои 2021-2023 қайд карда шудааст, афзоиши солонаи содироти семент дар ҳаҷми 200 ҳазор тонна пешбинӣ гардидааст. То он замон ба нақша гирифта шудааст, ки афзоиши ҳаҷми тавлиди ин масолеҳи сохтмонӣ ба 5,3 млн тонна расонида шавад, хабар медиҳад агентии «Авесто».

Дар бахши саноати кишвар ҳар сол миқдори иқтидорҳои нави истеҳсолӣ ва ҳаҷми истеҳсоли семент афзоиш меёбад. Аммо, дар баробари афзоиши истеҳсолот талаботи дохилӣ ба ин маводи сохтмонӣ низ зиёд мешавад. Тамоми талаботи дохилӣ ба семент, ба истиснои сементи ранга (ҳаҷми талабот ба он кам аст), аз ҳисоби истеҳсолоти дохилӣ қонеъ карда мешавад. Дар айни замон 16 корхона ба истеҳсоли семент машғул мебошанд ва иқтидори солонаи онҳо 5,6 млн тоннаро ташкил медиҳад.

Соли гузашта дар Тоҷикистон зиёда аз 4,2 млн тонна семент истеҳсол шуда буд. Тибқи маълумоти Вазорати саноат ва технологияҳои нави кишвар, аз ҳаҷми умумии маҳсулоти истеҳсолшуда беш аз 1,3 млн тонна ба кишварҳои ҳамсоя содир шудааст.

Харидорони асосии сементи Тоҷикистон Ӯзбекистон ва Афғонистон мебошанд. 764 ҳазор тонна семент ба Ӯзбекистон фурӯхта шуда, ҳаҷми содирот ба Афғонистон 505 ҳазор тоннаро ташкил дод. Ба Қирғизистон 42 ҳазор тонна семент содир шудааст.

                                                   АКС аз манбаъҳои озод