Бонувони баскетболбози Донишгоҳи давлатии Данғара дар мусобиқаи вилоятӣ соҳиби ҷои дуюм шуданд

ДУШАНБЕ, 16.04.2021 /АМИТ «Ховар»/. Аз 13 то 15  апрел бахшида ба 30-солагии Истиқлоли давлатии Ҷумҳурии Тоҷикистон дар шаҳри Бохтари вилояти Хатлон байни донишҷӯдухтарони мактабҳои олии вилояти Хатлон мусобиқаи баскетбол баргузор гардид. Тавре  ёвари ректор ва мудири бахши  робита бо фазои иттилоотии Донишгоҳи давлатии Данғара Муҳаммад  Шораҳимзода ба АМИТ «Ховар» хабар дод,  дар ин мусобиқа дастаи Донишгоҳи давлатии Данғара ба гирифтани ҷойи дуюм мушарраф  гардид.

Дар мусобиқаи  баскетбол, ки  бо  иқдоми Кумитаи Иҷроияи Марказии Ҳизби Халқии Демократии Тоҷикистон ва  бо мақсади ба варзиш ҷалб намудани занону духтарон ва ташвиқи тарзи ҳаёти солим дар вилоят сурат гирифт, 5 даста бо ҳам рақобат намуда, дастаи Донишгоҳи давлатии Бохтар ба номи Носири Хусрав ҷойи аввал, дастаи Донишгоҳи давлатии Данғара ҷойи дуюм ва дастаи Донишкадаи технология ва менеҷменти инноватсионӣ дар шаҳри Кӯлоб сазовори ҷойи сеюм гардида,    бо диплом ва медалҳо сарфароз гардонида шуданд.

Мақсад ва вазифаи мусобиқа- ин дар рӯҳияи баланд истиқбол гирифтани 30-солагии Истиқлоли давлатии Ҷумҳурии Тоҷикистон, тарғиби тарзи ҳаёти солим, ҷалб намудани ҷавондухтарон ба тарбияи ҷисмонӣ ва варзиш, тарғибу ташвиқ намудани варзиши баскетбол ва мустаҳкам намудани алоқаи дӯстӣ байни варзишгарон мебошад.

Дар мусобиқаи мазкур дастаҳои мактабҳои олии вилояти Хатлон иштирок варзида, ҳайати дастаҳо аз 10 нафар варзишгар ва 1 мураббӣ иборат буд.

Мусобиқа тибқи қоидаҳои Федератсияи байналмилалии баскетбол дар шакли олимпӣ баргузор гардид. Дар ҷараёни баргузории он масъулин изҳор доштанд, ки соҳаи тарбияи ҷисмонӣ ва варзиш яке аз самтҳои афзалиятноки  сиёсати иҷтимоии Ҳукумати кишвар ба ҳисоб рафта, ба таъмини оммавияти варзиш, таҳкими тарзи ҳаёти солим ва мусоидат ба омодакунии варзишгарони касбӣ барои иштирок дар мусобиқаҳои сатҳи ҷаҳонӣ равона шудааст.