Дар хоҷагиҳои ноҳияи Бобоҷон Ғафуров кишти чигит оғоз ёфт

ХУҶАНД, 13.04.04 /AMIT «Ховар»/. Дар саҳроҳои ҳафт ноҳияи пахтакори вилояти Суғд корҳои кишту кори баҳорӣ ҳар рӯз суръат мегиранд.

Бобоҷон Ғафуров яке аз ноҳияҳои калонтарин пахтакорӣ мебошад. Интизор меравад, ки соли равон дар ин ҷо дар майдони беш аз 8 ҳазор гектар чигит кишт шавад.

Тавре ки ба мухбири АМИТ «Ховар» аз шуъбаи кишоварзии дастгоҳи ҳукумати ноҳия хабар доданд, 12 апрел бо иштироки раиси ноҳия, собиқадорони меҳнат ва куҳансолон дар саҳроҳои хоҷагиҳои пахтакори ноҳия — Унҷӣ, Замини нав ва ба номи Додоҷон Набиев, Ҷамъияти саҳомии кушодаи ба номи Саидхоҷа Урунхоҷаев кишти чигит оғоз карда шуд.

Ба гуфтаи раиси ҶСК ба номи С.Урунхоҷаев Азамат Қодиров, имсол деҳқонон дар қатори навъи тухмии воридшудаи «Флеш», инчунин навъҳои серҳосили маҳаллии «Хуҷанд-67», «Неъмат» ва «Дӯстӣ» кишт мекунанд. Кишоварзон тамоми меъёрҳои агротехникиро риоя намуда, ҳосили хубу фаровон интизоранд.

Дар хоҷагӣ 2700 га замини корам мавҷуд аст, ки 1700 гектари он барои кишти пунбадона ҷудо карда шудааст.

АКС аз бойгонии АМИТ «Ховар»