Вазири корҳои хориҷии Тоҷикистон бо Котиби иҷроияи Комиссияи иқтисодӣ-иҷтимоии СММ барои Осиё ва Уқёнуси Ором мулоқот намуд

ДУШАНБЕ, 06.04.2021 /АМИТ «Ховар»/. 6 апрел вохӯрии Вазири корҳои хориҷии Ҷумҳурии Тоҷикистон Сироҷиддин Муҳриддин бо Котиби иҷроияи Комиссияи иҷтисодӣ-иҷтимоии СММ барои Осиё ва Уқёнуси Ором Армида Салсия Алишаҳбана дар шакли видеоконференсия баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Ҷонибҳо атрофи масъалаҳои марбут ба коҳиши пайомадҳои иқтисодӣ-иҷтимоии ҳамагирии COVID-19, ислоҳоти СММ, ташаббусҳои байналмилалии Тоҷикистон ва иштироки Тоҷикистон дар иҷлосияи 77-уми Комиссияи мазкур, ки 26-29 апрели соли 2021 дар шакли видеоконфренсия  баргузор мегардад,  табодули назар намуданд.

Инчунин ҷонибҳо масоили дурнамои ҳамкорӣ дар соҳаҳои обу энергетика, нақлиёт ва иқтисодро мавриди баррасӣ қарор доданд. Зикр гардид, ки барои дастгирии кишварҳои узв дар самти татбиқи  ҳадафҳои Рӯзномаи 2030 фаъолгардонии механизми ҳамкории комиссияҳои минтақавии СММ бо тими кишварии СММ тавассути ҷалби сармоя, аз ҷумла бахши хусусӣ муҳим арзёбӣ мегардад.

АКСҲО аз ВКХ ҶТ