Сироҷиддин Муҳриддин бо Ҳелга Шмид масъалаҳои марбут ба вазъ дар минтақаи сарҳадии Тоҷикистон ва Қирғизистонро баррасӣ намуданд

Май 7, 2021 16:35

ДУШАНБЕ, 07.05.2021 /АМИТ «Ховар»/. Имрӯз, 7 май мулоқоти маҷозии Вазири корҳои хориҷии Ҷумҳурии Тоҷикистон Сироҷиддин Муҳриддин бо Дабири кулли Созмони амният ва ҳамкорӣ дар Аврупо (САҲА) хонум Ҳелга Шмид сурат гирифт. Дар рафти мулоқот доираи васеи масъалаҳои ҳамкорӣ дар чаҳорчӯби САҲА мавриди баррасӣ қарор гирифтанд. Масъалаҳои марбут ба вазъ дар минтақаи сарҳадии Тоҷикистон ва Қирғизистон дар меҳвари ин суҳбат қарор дошт. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

С.Муҳриддин дар бораи даргириҳои ахир дар марз бо Қирғизистон иттилоъ дода, доир ба натиҷаи музокироти ду кишвар дар ҳама сатҳҳо бобати ба эътидол овардани вазъ дар сарҳад, аз ҷумла тавофуқот дар мавриди эълони оташбас ва омодагии ҷонибҳо барои ҳалли вазъияти бавуҷудомада аз тариқи гуфтушунид ва бо истифода аз василаҳои сиёсию дипломатӣ маълумот дод.

Ҳ.Шмид аз тавофуқоти тарафайн роҷеъ ба оташбас ва ҳалли низои мусаллаҳона дар қитъаҳои наздимарзии Тоҷикистон ва Қирғизистон истиқбол намуда, ба риояи уҳдадориҳои дар чаҳорчӯби САҲА гирифташуда тавассути идомаи кӯшишҳо ва музокирот барои коҳиш додани шиддати вазъ ташвиқ намуд. Зимнан Дабири кулли САҲА кумаки ҳамаҷонибаи Созмонро барои мусоидат ба ҳалли мусолиматомези ҳолати бавуҷудомада пешниҳод кард.

Ғайр аз ин, мусоҳибон аҳамияти муқовимати муштарак алайҳи чолишҳои муосир, аз қабили таъсири ҳамагирии COVID-19 ба иқтисодиёт, тағйирёбии иқлим, амнияти сарҳадӣ, мубориза бо терроризму ифротгароӣ, гардиши ғайриқонунии маводи мухаддир ва аслиҳа таъкид намуданд. Масъалаҳои ҳуқуқи инсон, баробарии гендерӣ ва баланд бардоштани нақши занон дар ҳаёти сиёсиву иқтисодии ҷомеа низ муҳокима шуданд.

Дар мулоқот вазъи Афғонистон матраҳ гардида, саҳми Тоҷикистон ва нақши лоиҳаҳои минтақавӣ дар раванди эҷоди сулҳ ва эҳёи иқтисодӣ дар ин кишвар муҳим арзёбӣ шуданд. Дар ин маврид нақши Коллеҷи идораи сарҳадии САҲА барои кормандони аршад дар Душанбе дар бозомӯзи онҳо дар масъалаҳои идораи сарҳадӣ дар минтақаи САҲА таъкид гардид.

С.Муҳриддин зикр намуд, ки Тоҷикистон САҲА-ро ҳамчун платформаи муҳим барои муколамаи созанда шуморида, ҷиҳати тавсеаи муносибатҳо бо Созмон ҳавасманд мебошад.

Тарафайн барои истифодаи имконияти фаровон ҷиҳати густариши ҳамкорӣ дар чорчӯби се ченаки САҲА – низомӣ-сиёсӣ, иқтисодӣ-муҳитизистӣ ва инсонӣ изҳори омодагӣ намуданд.

Май 7, 2021 16:35

Хабарҳои дигари ин бахш

Дар Исломобод густариши ҳамкории фарҳангии Тоҷикистону Покистон баррасӣ гардид
Густариши ҳамкории Тоҷикистон бо Австрия ва Созмони байналмилалии муҳоҷират баррасӣ шуд
Корвони мотосиклронҳои Покистон ба Тоҷикистон меояд
Сафири Тоҷикистон дар Узбекистон бо сохтмони роҳи оҳани Самарқанд – Панҷакент шинос гардид
Раванди татбиқи Консепсияи раёсати Тоҷикистон дар Иттиҳоди Давлатҳои Мустақил баррасӣ шуд
Дурнамои густариши робитаҳо байни Тоҷикистон ва Белгия баррасӣ гардид
Густариши ҳамкории Тоҷикистон ва Беларус дар соҳаи сохтмон ва меъморӣ баррасӣ шуд
Дурнамои рушди муносибатҳои Тоҷикистон ва Эрон баррасӣ шуд
Вазири корҳои хориҷии Ҷумҳурии Исломии Эрон бо сафари расмӣ ба Ҷумҳурии Тоҷикистон ташриф меорад
Густариши ҳамкории Тоҷикистон ва Ангола дар соҳаҳои мухталиф баррасӣ шуд
Густариши ҳамкории Тоҷикистон бо Бонки исломии рушд баррасӣ шуд
Сафари давлатии Президенти Муғулистон дар Ҷумҳурии Тоҷикистон анҷом ёфт