ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Ишкошим сохтмони бинои маъмурии бахши ҳифзи муҳити зисти ноҳия оғоз гардид

ДУШАНБЕ, 11.06.2021. /АМИТ «Ховар»/. Роҳбари гурӯҳи кории Ҳукумати Ҷумҳурии Тоҷикистон вобаста ба пешвози сазовори  ҷашни 30-солагии Истиқлоли давлатии Ҷумҳурии Тоҷикистон дар ноҳияи Ишкошим, директори Маркази миллии қонунгузории назди Президенти Ҷумҳурии Тоҷикистон Иззатулло Саидзода ва раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода  9 июн бо мақсади шиносоӣ бо ҷараёни корҳои сохтмонӣ ва бунёдкорию ободонӣ аз ноҳияи Ишкошими ВМКБ дидан намуданд.

Дар  ҷараёни  сафар бо мақсади рушди инфрасохтори ноҳия ва беҳтар намудани шароиту имкониятҳои корӣ ба сохтмони бинои маъмурии бахши ҳифзи муҳити зисти ноҳия санги асос гузошта шуд.

Гурӯҳи мазкур  бо сокинони ноҳия мулоқот намуда, онҳоро ба ифтихори 24-умин солгарди Ваҳдати миллӣ ва 30-солагии Истиқлоли давлатии Ҷумҳурии Тоҷикистон табрик намуда, даъват намуданд, ки барои дар сатҳи баланд ва бо дастовардҳои назаррас таҷлил намудани ин ду ҷашни фархундаи миллӣ ҳар кадоме саҳми намоён гузоранд.

Хотиррасон менамоем, ки дар ноҳияи Ишкошим ба ифтихори ҷашни 30-солагии Истиқлоли давлатии Ҷумҳурии Тоҷикистон 76 иншооти таъйиноти гуногун сохта мавриди баҳрабардорӣ  қарор дода мешавад. Аксари ин иншоот аллакай бунёд шуда, корҳои сохтмонӣ дар иншооти дигар бо маром идома доранд.