Дар Бохтар иштирокчиёни ҳамоиши соҳибкоронро аз Ӯзбекистон гарм истиқбол намуданд

Июнь 9, 2021 10:15

БОХТАР, 09.06.2021/АМИТ «Ховар»/. Дар ҳамин лаҳзаҳо дар Бохтар истиқболи ботантанаи иштирокчиёни ҳамоиши соҳибкорон аз Ӯзбекистон идома дорад, иттилоъ медиҳад хабарнигори минтақавии АМИТ «Ховар» Зулайхо Ғоибова.

Меҳмонони кишвари ҳамсояро бо навоҳои сурнай ва карнай пешвоз мегиранд. Дар ҳама ҷо сурудҳо ба забонҳои тоҷикӣ ва ӯзбекӣ садо медиҳанд. Фазои дӯстӣ ва ҳамсоягии нек эҳсос мешавад. Занону духтарон либосҳои миллии идонаро ба бар кардаанд.

Дар майдони «70-солагии азхудкунии водии Вахш» ҳайати Ӯзбекистонро роҳбарияти вилоят, инчунин роҳбарони як  қатор вазорату идораҳои кишвар бо меҳмоннавозии хоси халқи тоҷик пешвоз гирифтанд.

Бояд гуфт, ки дар ин рӯзҳо симои шаҳр дигаргун шудааст,  ба он  парчамҳои ду кишвар, инчунин баннерҳо бо тасвирҳои сарварони давлатҳо — Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев шукӯҳи идона бахшидааст.

Барои меҳмонон намоишгоҳи ғании маҳсулоти косибони тоҷик ташкил шудааст. Аз ҷумла, ҷавоҳироти дастсози миллии нуқрагин, маҳсулоти ороишӣ, маснуоти гилин, зарфҳои чӯбин, сандуқчаҳо, сабадҳо, рӯйҷоиҳо, сумкаҳо, ғилофҳои телефонҳои мобилии бо усули «қироқдӯзӣ», «чакан» ва «зардузӣ» таҳияшуда, инчунин либосҳои миллии занона барои кӯдакон ва калонсолон бо нақшу нигори анъанавӣ пешниҳод  гардидаанд.

Илова бар ин, намоишгоҳи дастовардҳои кишоварзии кишвар ташкил шудааст ва дар он меваҳои аз ҷиҳати экологӣ тоза, хушбӯй, ширадор, инчунин сабзавот ва маҳсулоти коркардшудаи кишоварзӣ ба намоиш гузошта шудааст.

Тавре яке  аз аъзои ҳайати Ӯзбекистон, соҳибкор аз Самарқанд Бахтиёр Бекназаров, ки дар намоишгоҳ имкони суҳбат бо ӯ муяссар гардид, зикр  кард,  «истиқболи ҳайати Ӯзбекистон дар сатҳи олӣ ташкил карда шудааст. Мо интизор надоштем, ки моро ин тавр ботантана пешвоз мегиранд. Басо хушоянд аст, ки ҳамсояҳои тоҷикамон хеле самимона  моро пешвоз мегиранд».

Ба гуфтаи соҳибкори самарқандӣ, ӯ ба Тоҷикистон бо мақсади танзими робитаҳои тиҷоратӣ, инчунин шиносоӣ бо фазои иқтисодӣ ва сармоягузории кишвар омадааст.

«Азбаски ман ба истеҳсол, бастубанди меваҳои хушк ва содироти онҳо ба кишварҳои Аврупо ва Канада машғулам, ҳангоми боздид аз намоишгоҳи кишоварзӣ маҳсулоти коркардшудаи кишоварзӣ маро мутаассир ва таваҷҷуҳамро ҷалб сохт. Умедворам, ки ин сафар на танҳо барои ман, балки барои соҳибкорони тоҷик низ дар заминаи табодули таҷриба ва ҳамкорӣ босамар хоҳад буд», — афзуд мусоҳиб.

Мавриди зикр аст,  ки дар соатҳои наздик ҳамоиши тиҷоратии соҳибкорони Тоҷикистон ва Ӯзбекистон, ки ба рушди ҳамкории мутақобилан судманд, табодули таҷриба, афзоиши содироти молҳо ва хидматрасониҳои ду кишвар нигаронида шудааст, оғоз меёбад.

Дар ҳамоиши тиҷоратӣ тақрибан 175 нафар соҳибкор ва роҳбарони як қатор сохторҳои давлатии Ҷумҳурии Ӯзбекистон, инчунин зиёда аз 140 нафар соҳибкор аз давлатҳои ҳамсоя иштирок мекунанд.

Ҳамоиши соҳибкорон дар арафаи сафари Президенти Ҷумҳурии Ӯзбекистон Шавкат Мирзиёев ба Тоҷикистон 10-11 июн ташкил шудааст.

Барои ҳайати Ӯзбекистон инчунин барномаи ғании фарҳангӣ зери унвони «Шоми дӯстӣ» ба нақша гирифта шудааст.

 АКС аз шабакаҳои иҷтимоӣ

Июнь 9, 2021 10:15

Хабарҳои дигари ин бахш

Ҳаҷми умумии маҳсулоти кишоварзии Вилояти Мухтори Кӯҳистони Бадахшон ба як миллиард сомонӣ расид
Дар ноҳияи Ёвон беш аз 22 ҳазор тонна маҳсулоти ғаладонагӣ ҷамъоварӣ гардидааст
Эмомалӣ Раҳмон: «Ҳаҷми истеҳсоли маҳсулоти саноатӣ дар Вилояти Мухтори Кӯҳистони Бадахшон соли 2024 ба беш аз 307 миллион сомонӣ расид»
Шумораи субъектҳои соҳибкорӣ дар Вилояти Мухтори Кӯҳистони Бадахшон ба 11 ҳазор расид
Эмомалӣ Раҳмон: «Ташрифи сайёҳон ба Вилояти Мухтори Кӯҳистони Бадахшон 13 баробар афзудааст»
Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Эмомалӣ Раҳмон: «Ба рушди Вилояти Мухтори Кӯҳистони Бадахшон зиёда аз 25 миллиард сомонӣ равона шудааст»
Дар Хадамоти гумрук моҳияти қонунҳои миллӣ тавзеҳ дода шуд
Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Раҳмон Исломиддин дар ҷаласаи навбатии Шурои байнидавлатӣ оид ба стандартизатсия, метрология ва сертификатсияи давлатҳои аъзои ИДМ иштирок намуд
Дар Турсунзода Фестивали саводнокии молиявӣ баргузор шуд