«ШОМИ ДӮСТӢ». Ин барномаи фарҳангиву фароғатӣ имрӯз дар Муассисаи давлатии «Аҳорун» баргузор мегардад

ДУШАНБЕ, 25.06.2021 /АМИТ «Ховар»/. Шоми имрӯз дар толори Муассисаи давлатии фарҳангию фароғатии «Аҳорун» (собиқ Амфитеатр) барномаи фарҳангиву фароғатии «Шоми дӯстӣ» баргузор мегардад, ки он дар доираи Форуми байналмилалии ҷавонон таҳти унвони «Ояндаро бо ҳам месозем!» ва татбиқи барномаи байнидавлатии Иттиҳоди Давлатҳои Мустақил «Душанбе — пойтахти фарҳангии Иттиҳод-2021» роҳандозӣ шуда, мақсад аз он мустаҳкам намудани риштаи дӯстӣ байни ҷавонони ИДМ, муаррифии таърих, фарҳанг ва осори пурғановат мебошад. Оғози барномаи фарҳангиву фароғатии «Шоми дӯстӣ» соат 19:00 муайян шудааст.

Аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки дар барномаи фарҳангиву фароғатии «Шоми дӯстӣ» иштирокчиёни Форуми байналмилалии ҷавонон, ки  намояндагони давлатҳои Тоҷикистон, Ӯзбекистон, Қазоқистон, Федератсияи Россия, Беларус, Молдова ва Озарбойҷон мебошанд, ҳунару санъати волои давлати худро пешниҳоди ҳозирин мегардонанд.

Ёдовар мешавем, ки Форуми байналмилалии ҷавонон таҳти унвони «Ояндаро бо ҳам месозем!» 19 июн оғоз шуда, то 26 июни соли равон идома меёбад. Дар форуми мазкур 45 нафар ҷавонон аз ИДМ иштирок доранд.