Тарабхонаи «Дидор»-и пойтахт ғолиби даври шаҳрии Озмуни ҷумҳуриявии «Хӯришҳои миллӣ ва муосир» гардид

ДУШАНБЕ, 26.06.2021 /АМИТ «Ховар»/.  25 июн  бо ташаббуси мақомоти иҷроияи ҳокимияти давлатии шаҳри Душанбе дар ҳамкорӣ бо Иттифоқи «Тоҷикматлубот» даври шаҳрии Озмуни ҷумҳуриявии  «Хӯришҳои миллӣ ва муосир» баргузор гардид. Дар даври шаҳрии озмун довталабоне, ки дар даври ноҳиявии ин озмун  ғолиб гардида буданд, иштирок намуда, ба ҳайати ҳакамон ва меҳмонон хуришҳои омоданамудаи худро муаррифӣ намуданд. Дар натиҷа  тарабхонаи  «Дидор» ҷойи аввалро мушарраф гардида,  ҷои дуюм ба   тарабхонаи «Яккасарой» ва мақоми сеюм ба  тарабхонаи «Мерве» сазовор дониста шуд.

Дар ин бора сардори шуъбаи иттилооти дастгоҳи Раиси шаҳри Душанбе Ҷамшед Олимов ба АМИТ«Ховар» хабар дод.

— Дар даври шаҳрии Озмуни ҷумҳуриявии «Хӯришҳои миллӣ ва муосир» муовинони Раиси шаҳри Душанбе Мавсума Муинӣ ва Умед Гуреззода, намояндагони Иттифоқи «Тоҷикматлубот», намояндагони чор ноҳияи пойтахт ва беҳтарин ошпазону кадбонувон иштирок намуданд-, иттилоъ дод манбаъ.

Қабл аз маросими мукофотсупорӣ муовини Раиси шаҳри Душанбе Мавсума Муинӣ  иштирокчиёни озмунро табрик намуда, зикр кард, ки бо ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри рушди тамоми соҳаҳо, ҷалби бештари сайёҳон ба мамлакат ва муаррифии кишвар дар арсаи ҷаҳон солҳои 2019-2021 Солҳои рушди деҳот, сайёҳӣ ва ҳунарҳои мардумӣ эълон карда шудааст.

«Озмуни «Хӯришҳои миллӣ ва муосир дар шаҳри Душанбе» бо мақсади тарбияи ҳисси зебоипарастӣ, хештаншиносӣ, ҳунармандӣ, ватандӯстӣ, тарғиби тарзу намуди тайёр кардани хуришҳои миллию муосир, табодули таҷрибаи пешқадами истеҳсолкунандагони хӯришҳои миллию муосир ва сазовор пешвоз гирифтани ҷашни 30-солагии Истиқлоли давлатии Ҷумҳурии Тоҷикистон роҳандозӣ гардидааст”, — афзуд М.Муинӣ.

Ғолибони озмун бо мукофотҳои пулӣ, диплому сипоснома ва туҳфаҳои хотиравӣ аз ҷониби роҳбарияти мақомоти иҷроияи ҳокимияти давлатии шаҳри Душанбе ва Иттифоқи «Тоҷикматлубот» қадрдонӣ карда шуданд. Иштирокчиёни фаъоли  озмун низ қадрдонӣ карда шуданд.

Ёдовар мешавем, ки  Озмуни ҷумҳуриявии “Хӯришҳои миллӣ ва муосир” ҷиҳати иҷрои Амри Президенти Ҷумҳурии Тоҷикистон аз 13 декабри соли 2018 “Дар бораи тасдиқи ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021” ва Қарори Раиси шаҳри Душанбе дар бораи баргузор намудани  ин озмун  баргузор гардид.