«УзА»: Президенти Ӯзбекистон бо сафари расмӣ ба Тоҷикистон ташриф меоранд

Июнь 9, 2021 11:30

ДУШАНБЕ, 09.06.2021 /АМИТ «Ховар»/. Президенти Ҷумҳурии Ӯзбекистон Шавкат Мирзиёев бо даъвати Президенти Ҷумҳурии Тоҷикистон Эмомалӣ Раҳмон рӯзҳои 10-11 июни соли равон бо сафари расмӣ ба Ҷумҳурии Тоҷикистон ташриф меоранд, менависад Агентии миллии иттилоотии Ӯзбекистон «УзА».

Бино ба иттилои манбаъ, тибқи барномаи сафар баргузории чорабиниҳои дуҷониба дар шаҳри Душанбе — маросими истиқболи расмӣ, музокироти хоса ва бо иштироки ҳайатҳо, маросими ифтитоҳи онлайнии иншооти иҷтимоӣ ва имзои бастаи санадҳои дуҷониба дар назар аст.

Қарор аст, ки масъалаҳои мубрами таҳкими минбаъдаи муносибатҳои дӯстӣ, ҳамсоягии нек ва шарикии стратегии Ӯзбекистону Тоҷикистон баррасӣ шаванд. Таваҷҷуҳи махсус ба муайян кардани «нуқтаҳои рушд»-и ҳамкории гуногунҷанба ва пешбурди лоиҳаҳои мушаххас оид ба рушди ҳамкории амалии дарозмуддат дода мешавад. Сарони давлатҳо,  инчунин доир ба ҷанбаҳои сиёсати байналмилалӣ ва рӯзномаи минтақавӣ мубодилаи афкор хоҳанд кард.

Ғайр аз ин, сарони давлатҳо дар чорабиниҳои муштараки фарҳангӣ дар пойтахти Тоҷикистон ширкат варзида, бо намояндагони ҷомеа мулоқот мекунанд ва аз як зумра  иншооти саноатии вилояти Суғд боздид менамоянд.

Дар доираи ин сафар ба имзо расонидани зиёда аз 30 санад, ки самтҳои муҳими ҳамкории мутақобилан судманди Ӯзбекистон ва Тоҷикистонро дарбар мегиранд, дар назар аст.

Мавриди зикр аст, ки солҳои охир муносибатҳои Ӯзбекистон ва Тоҷикистон ба марҳилаи сифатан нав — ба сатҳи шарикии стратегӣ, ки бо мундариҷаи мушаххаси амалӣ пур шудаанд, баромадаанд.

Бо ташаббус ва ба шарофати иродаи матини сиёсии сарони ду давлат масъалаҳои мубрами рушди робитаҳои ду кишвар ва халқи бародар ҳал шуданд.

Ҳаҷми мубодилаи савдои тарафайн ба таври назаррас афзоиш ёфта, соли гузашта аз 500 миллион доллар гузашт ва зиёда аз 200 корхонаи муштарак таъсис дода шуданд. Дар соҳаи гуманитарӣ мубодилаи самарабахш  ва робитаҳои судманд миёни минтақаҳо мавҷуданд.

Дар шароити душвори пандемия  Ӯзбекистон ва Тоҷикистон дар рафъи оқибатҳои коронавирус ҳамбастагӣ ва кӯмаки муштарак нишон доданд.

Дар доираи омодагӣ ба саммити дарпешистода ҷаласаи Комиссияи байниҳукуматӣ таҳти сарварии сарвазирони ду кишвар, конфронси илмӣ-амалӣ, Рӯзҳои кинои Ӯзбекистон ва дигар чорабиниҳо бомуваффақият баргузор шуданд. Дар арафаи сафар, инчунин Форуми якуми байниминтақавӣ ва ҷаласаи Шӯрои соҳибкорон баргузор мешавад.

АКС: Хадамоти матбуоти Президенти ҶӮ

Июнь 9, 2021 11:30

Хабарҳои дигари ин бахш

Нишасти навбатии Гурӯҳи корӣ дар қолаби С5+Олмон баргузор гардид
Тоҷикистон аз созиши оташбас байни Исроил ва Эрон истиқбол менамояд
Сафири Тоҷикистон ба Президенти Малдив эътимоднома супорид
Дар Душанбе тақвияти ҳамкорӣ байни Тоҷикистон ва Қатар дар соҳаи иқтисоду тиҷорат баррасӣ шуд
Сироҷиддин Муҳриддин дар ҷаласаи вазирони корҳои хориҷии давлатҳои аъзои Созмони ҳамкории исломӣ иштирок намуд
Тоҷикистон зарбаҳои неруҳои ҳарбии ҳавоии Амрико ва Исроилро ба иншооти ҳастаии Эрон қатъиян маҳкум мекунад
Роҳбарони агентиҳои давлатии иттилоотии кишварҳои ИДМ дар Санкт-Петербург рушди ҳамкориро баррасӣ намуданд
Дар Душанбе Конфронси байналмилалӣ «Осиёи Марказӣ – меҳвари СҲШ: 25 соли ҳамкорӣ ба хотири рушди муштарак» доир гардид
Дар Корея аз иқдомҳои Тоҷикистон дар самти мубориза бо биёбоншавӣ ва хушкӣ ёдовар шуданд
Дар Душанбе машваратҳои сиёсӣ байни вазоратҳои корҳои хориҷии Тоҷикистон ва Венесуэла баргузор шуд
Байни давлатҳои Осиёи Марказӣ ва Чин Паймони ҳамсоягии абадӣ, дустӣ ва ҳамкорӣ ба имзо расид
Шараф Шерализода дар иҷлосияи 59-уми Шурои ҳуқуқи инсони СММ иштирок намуд