Варзишгарони тоҷик дар Чемпионати Осиё иштирок мекунанд

ДУШАНБЕ, 16.06.2021 /АМИТ «Ховар»/. Дастаи мунтахаби Тоҷикистон оид ба таэквондо дар ҳайати 7 варзишгар ҷиҳати иштирок дар 24-умин  Чемпионати Осиё ба Лубнон сафар кард. Чемпионати Осиё оид ба таэквондо 16-18 июни соли равон дар шаҳри Бейрут баргузор мешавад. Дар  ин бора  аз Федератсияи таеквондои Тоҷикистон ба шореҳи варзиши АМИТ «Ховар» Меҳрони Қурбон хабар доданд.

Тибқи иттилои манбаъ, дар чемпионати мазкур  иштироки 186 варзишгар аз 30 давлат дар назар аст.

Федератсияи таэквондои Тоҷикистон 7 варзишгар (4 мард, 3 зан)-ро ба Лубнон сафарбар кард:

Мардҳо

1. Шоҳрух Баротов (-58кг)
2. Муҳаммадҳасан Шоҳмаҳмадов (-68кг)
3. Хуррам Меҳтаршоев (-74кг)
4. Муҳаммадҳусейн Шоҳмаҳмадов (-80кг)

Бонувон

5. Муниса Ойматова (-49кг)
6. Муниса Исматова (-62кг).
7. Моҳру Ҳалимова (-67кг)

Варзишгарони шинохтаи  тоҷикро дар ин сафар мураббиён Исломиддин Фозилов ва Шамсулло Қодиров роҳбарӣ  мекунанд. Ҳамчунин ду довари дараҷаи байналмилалӣ аз Тоҷикистон — Давлатшо Мирзоев ва Вафоназар Алиназаров мусобиқотро дар ин чемпионат доварӣ менамоянд. Ба иттилои Федератсияи таэквондо ВТФ-и Тоҷикистон, дар арафаи Чемпионати Осиё Сафири Тоҷикистон дар Ҷумҳурии Корея Юсуф Шарифзода, ки ҳамзамон ноиби раиси Федератсияи таэквондо ВТФ-и Тоҷикистон мебошад, аз ҷониби муассисаи таълимии таэквондо – Куккивон дар Сеул бо камарбанди дани 6-ум (нозири байналмилалӣ) сарфароз гардид.