ФУТБОЛ. «Истаравшан» бар дастаи «Истиқлол» ғолиб омад

ДУШАНБЕ, 08.07.2021 /АМИТ «Ховар»/. Дастаи футболи «Истиқлол»-и шаҳри Душанбе дар бозии мавқуфмондаи даври 3-юми чемпионати Тоҷикистон дар меҳмонӣ аз дастаи футболи «Истаравшан»-и шаҳри Истравшан мағлуб шуд. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.

Мавриди зикр аст, ки футболбози японии  дастаи «Истиқлол»-и шаҳри Душанбе  Рета Нома дар дақиқаи 37-ум гол зада, дастаашро ба пеш баровард. Қабл аз анҷоми қисми аввали бозӣ, Илҳом Баротов 45+1 ҳисоби рақобатро 1:1 кард. Голи пирӯзиоварро дар дақиқаи 81-уми сабқат Бахтиёр Абдураҳмонов ба нишон  расонида, ғалабаи  дастаи футболи «Истаравшан»-и шаҳри Истравшанро бо натиҷаи 2:1 таъмин сохт. Бояд гуфт, ки ин аввалин бохти дастаи футболи  «Истиқлол»-и  шаҳри Душанбе дар мавсими ҷорӣ ба ҳисоб меравад.

Чемпионати Тоҷикистон-2021

Лигаи олӣ. Бозии мавқуфмондаи даври 3-ум

«Истаравшан» – «Истиқлол» – 2:1

Голҳо: Рёта Нома, 37 (0:1). Илҳом Баротов, 45+1 (1:1). Бахтиёр Абдураҳмонов, 81 (2:1).