Ҷаласаи дуюми роҳбарони вазорату идораҳои ҳифзи муҳити зисти давлатҳои узви СҲШ ҷамъбаст гардид

ДУШАНБЕ, 29.07.2021 /АМИТ «Ховар»/. Ҷаласаи дуюми роҳбарони ҳифзи муҳити зисти  вазорату идораҳои давлатҳои узви Созмони Ҳамкории Шанхай /СҲШ/, ки давоми 2 рӯз дар   Душанбе  идома ёфт, имрӯз, 29 июл ҷамъбаст гардид.

Дар ин хусус ба АМИТ  «Ховар» аз Кумитаи ҳифзи муҳити зисти назди Ҳукумати  Ҷумҳурии Тоҷикистон иттилоъ доданд.

Дар ҳамоиш  изҳороти роҳбарони ҳайатҳо дар бораи ҳолат ва дурнамои рушди ҳамкорӣ дар соҳаи ҳифзи муҳити зисти кишварҳои аъзои СҲШ ва ҳисоботи ҷониби Тоҷикистон ҷиҳати ташкили Гурӯҳи махсуси кории давлатҳои аъзои СҲШ оид ба ҳифзи муҳити зист шунида шуд. Масъалаҳои асосии баррасишуда дар ҷаласаи дуюми роҳбарони вазорату идораҳои ҳифзи муҳити зисти давлатҳои аъзои СҲШ- ин  рушди ҳамкорӣ дар соҳаи экология барои кишварҳои аъзои СҲШ, алалхусус барои кишварҳои Осиёи Марказӣ буд. Дар ин замина, бинобар тағйирёбии иқлим ва хушк шудани баҳри Арал, обшавии босуръати пиряхҳо, норасоии захираҳои об, биёбоншавӣ, хушксолӣ, шӯршавӣ ва таназзули хок, бад шудани сифати ҳаво дар кишварҳои Осиёи Марказӣ, ки дар маркази таваҷҷуҳи СҲШ мебошанд, ба назар мерасад. Ин масъалаҳо зимни сухани ифтитоҳии Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур  Шерализода зикр шуданд.

Ҳамзамон масъалаҳо дар бораи лоиҳаи Нақшаи чорабиниҳо оид ба татбиқи амалии Консепсияи ҳамкорӣ дар соҳаи ҳифзи муҳити зисти кишварҳои узви СҲШ барои давраи солҳои 2022-2024, дар бораи натиҷаҳои Конфронси Осиёи Марказӣ оид ба тағйирёбии иқлим «Ҳамкории  минтақавӣ барои ояндаи устувори иқлим», ки 26-27 июли соли  2021 дар Душанбе баргузор гардид, иттилооти ҷониби МЭМОМ дар бораи вақт ва макони баргузории ҷаласаи навбатии роҳбарони вазорату идораҳои экологии кишварҳои узви СҲШ мавриди баррасӣ қарор гирифтанд. Бо назардошти муколамаи дастаҷамъӣ ва ироаи таклифу пешниҳодҳо ҳуҷҷатҳои ниҳоӣ қабул шуданд.

АКСҲО аз Кумитаи ҳифзи муҳити зисти назди Ҳукумати Ҷумҳурии Тоҷикистон