Икром Субҳонзода: «Вақте парвозҳои муназзам барқарор мешаванд, нархи ҳавопаймоҳо метавонад коҳиш ёбад»

Июль 28, 2021 14:28

ДУШАНБЕ, 28.07.2021 /АМИТ  «Ховар»/. Барқарорсозии парвозҳои мунтазам ба Русия метавонад нархи чиптаи ҳавопаймоҳоро аз Тоҷикистон ба Русия коҳиш диҳад. Дар ин бора дирӯз дар  нишасти матбуотӣ дар Душанбе директори Агентии авиатсияи граждании назди Ҳукумати Ҷумҳурии Тоҷикистон Икром Субҳонзода хабар дод. Ҳамзамон ба гуфтаи Субҳонзода, эмгузаронии оммавии аҳолӣ аз коронавирус ба барқарорсозии парвозҳои доимӣ мусоидат хоҳад кард. Алҳол байни Тоҷикистон ва Русия танҳо чаҳор парвози мунтазам  ба роҳ монда шудааст. Ду парвози ҳавопаймоҳо бо ширкати «Сомон Эйр»  ва ду парвози дигар аз ҷониби ширкати ҳавопаймоии Русия  «Уралские авиалинии» анҷом дода мешаванд.     

Директори Агентии авиатсияи граждании Тоҷикистон зикр  намуд, ки “алҳол аксарияти парвозҳо ба шаҳрҳои Русия чартерӣ мебошанд. Ҳавопаймоҳои ширкати  «Сомон Эйр»  ба шаҳрҳои Русия комилан холӣ парвоз мекунад ва аз он ҷо шаҳрвандони Тоҷикистонро мегиранд. Худи ҳамин ба ширкатҳои ҳавопаймоии Русия низ дахл дорад. Онҳо холӣ омада, шаҳрвандони худро мегиранд”.

Ба андешаи Икром Субҳонзода, то пандемияи коронавирус ба шаҳрҳои Русия то 34 парвози мунтазам анҷом дода мешуд, дар маҷмӯъ, Тоҷикистон омода аст ба реҷаи қаблӣ баргардад ва дархост барои барқарор кардани парвозҳои мунтазам ба сохторҳои марбутаи Федератсияи Русия ирсол карда шудааст.

Икром Субҳонзода мегӯяд, ки дар тӯли шаш моҳи соли равон сохторҳои мақомоти  ҳавопаймоии Тоҷикистон назар ба ҳамин давраи соли гузашта 215 миллион сомонӣ бештар даромад ба даст овардаанд. Мавсуф афзуд, ки миқдори умумии бор ва почтаи қабул ва интиқолгардида дар ин давра тавассути Фурудгоҳи байналмилалии Душанбе беш аз 535 тоннаро ташкил дод, ки ин омор нисбат ба ҳамин давраи соли гузашта 153 тонна ё беш аз 40 фоиз зиёд аст. Хатсайрҳои хизматрасонида 1841 ададро ташкил доданд, ки ин омор дар қиёс ба ҳамин давраи соли сипаригардида 346 адад зиёд мебошад.

Инчунин имсол дар Фурудгоҳи байналмилалии Душанбе 59 ҳолати ба таъхир гузоштани парвозҳо ба қайд гирифта шудааст. Ҳамзамон дар ин давра даромади Фурудгоҳи байналмилалии Душанбе  беш аз 170 миллион сомонӣ ва хароҷот зиёда аз 147 миллион сомониро ташкил додааст. Дар ин давра фурудгоҳҳои байналмилалии Душанбе, Бохтар, Хуҷанд ва Кӯлоб дар маҷмӯъ ба зиёда аз 517 ҳазор нафар мусофирон хизмат расонидаанд, ки нисбат ба ҳамин давраи соли гузашта 23,4 ҳазор ё 4,7 фоиз зиёд мебошад. Аз ин шумора ба Фурудгоҳи байналмилалии Душанбе беш аз 337 ҳазор мусофир, Хуҷанд зиёда аз 110 ҳазор, Кӯлоб зиёда аз 56 ҳазор ва ба Фурудгоҳи байналмилалии Бохтар беш аз 13 ҳазор мусофир рост меояд.

Июль 28, 2021 14:28

Хабарҳои дигари ин бахш

Дар Суғд Форуми «Имконоти тиҷорату сармоягузорӣ ва дурнамои рушди минтақаҳо» доир гардид
Масъалаи афзун намудани маблағгузории Гурӯҳи БИР ба соҳаҳои афзалиятноки Тоҷикистон баррасӣ шуд
Дар Тоҷикистон намояндагии «Agricultural Bank of China» ба фаъолият оғоз мекунад
Аз Тоҷикистон дар нуҳ моҳи соли равон 149,4 ҳазор тонна маҳсулоти кишоварзӣ содирот гардидааст
Ли Сон Хо: Корея барои тақвияти ҳамкорӣ бо Тоҷикистон маблағгузориро зиёд менамояд
Дар Вазорати рушди иқтисод ва савдо рушди иқтисодию иҷтимоии Тоҷикистон натиҷагирӣ гардид
Маҳсулоти «Парки нассоҷии шаҳри Кӯлоб» ба Русия, Туркия ва Қазоқистон содирот карда мешавад
Раиси вилояти Суғд бо соҳибкорони Русия мулоқот намуд
Ҷамшед Ҷумъахонзода ва Аҳмет Керестечи масъалаи таъсиси корхона дар минтақаҳои озоди иқтисодии Тоҷикистонро баррасӣ намуданд
Бо иштироки муовини Сарвазири Тоҷикистон соҳаҳои иқтисодию иҷтимоии шаҳри Ҳисор натиҷагирӣ шуданд
Дар доираи Шӯрои миллии рушди назди Президенти Тоҷикистон ҷаласаи «Вусъатдиҳии шуғли пурмаҳсул» доир шуд
ЧАРО НАРХИ СӮЗИШВОРӢ ДАР ТОҶИКИСТОН БОЛО РАФТ? Хабарнигори АМИТ «Ховар» бо ин савол ба Хадамоти зиддиинҳисорӣ муроҷиат намуд