Кумитаи андоз: Нақшаи андозҳо ва дигар пардохтҳои ҳатмӣ 101,4 % таъмин гардид

Июль 31, 2021 09:10

ДУШАНБЕ, 31.07.2021 /АМИТ  «Ховар»/. Дар шашмоҳаи якуми соли 2021  нақшаи андозҳо ва дигар пардохтҳои ҳатмӣ, ки ҷамъоварии онҳо ба зиммаи мақомоти андоз гузошта шудааст, ба андозаи 101,4% таъмин гардида, ба ҷойи 6 млрд 454,9 млн сомонии пешбинишуда, ба буҷети давлатӣ 6 млрд 545,9 млн сомонӣ ворид карда шуд, ки нисбат ба нишондиҳандаҳои пешбинишуда 91 млн сомонӣ зиёд мебошад. Дар ин бора 30 июл зимни нишасти матбуотӣ Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода сухан гуфт.

«Дар натиҷаи рушди иқтисодиёт, ташкили ҷойҳои нави корӣ ва тадбирҳои аз ҷониби мақомоти андоз андешида ҷиҳати беҳтар намудани маъмурикунонии андоз, хизматрасонӣ ба андозсупорандагон ва сифати корҳои назоратӣ, рақамикунонии мақомоти андоз, бештар ва беҳтар намудани корҳои тавзеҳотию фаҳмондадиҳӣ ба шаҳрвандон ва андозсупорандагон воридоти андозҳои дохилӣ ба буҷети давлатӣ тамоюли афзоиш дошта, омилҳои мазкур барои таъмини нақшаи андозҳо ва дигар пардохтҳои ҳатмӣ дар шашмоҳаи якуми соли равон мусоидат намуд.

Иҷрои сифатии қисми даромади буҷети давлатӣ нисбат ба солҳои қаблӣ беҳтар гардида, дар ин давра нақшаи танҳо як намуд — андоз аз арзиши иловашуда таъмин нагардид»,- афзуд Нусратулло Давлатзода.

Зикр шуд, ки бо мақсади ба танзим даровардани корҳои назоратӣ тайи солҳои охир банақшагирӣ ва гузаронидани санҷишҳо дар фаъолияти субъектҳои хоҷагидор асосан тибқи системаи баҳисобгирии хавфҳо ба роҳ монда шуда, тартиби мазкур имконият фароҳам овард, ки маъмурикунонии андоз ва сифати гузаронидани корҳои назоратӣ, махсусан санҷишҳои андозӣ ва назоратҳои камералӣ беҳтар карда шавад.

Дар шашмоҳаи якуми соли 2021 тибқи нақшаи тасдиқшуда ва дархостҳои мақомоти ҳифзи ҳуқуқ дар фаъолияти зиёда аз 730 нафар шахсони ҳуқуқӣ ва соҳибкорони инфиродӣ санҷиши риояи қонунгузории андоз гузаронида шуда, ба маблағи 377,8 млн. сомонӣ кам ҳисоб кардан ва пинҳонкунии андозҳо ошкор гардид. Аз ин ҳисоб ва аз ҳисоби маблағҳои солҳои қаблӣ ошкоршуда, дар маҷмӯъ ба буҷет 351,2 млн. сомонӣ ворид карда шуд.

Дар нишаст зикр шуд, ки дар давраи ҳисоботӣ ба воситаи рақами содакардашудаи телефонии «151» ва телефони боварии Раиси Кумитаи андоз ба Кумитаи андоз оид ба беамалӣ ва қонунвайронкуниҳои кормандон 46 муроҷиат ва шикоят ворид гардида, дар натиҷаи баррасии шикоятҳо барои дар сатҳи дахлдор риоя ва иҷро накардани уҳдадориҳои мансабӣ, вайрон намудани қоидаҳои рафтори кормандони мақомоти андоз ва дигар камбудиҳо нисбат ба як гурӯҳ кормандони мақомоти андоз дар шаклҳои гуногун муҷозоти интизомӣ татбиқ карда шуда, ҷиҳати пешгирии беамалӣ ва қонунвайронкунӣ бо дигар кормандон корҳои фаҳмондадиҳӣ гузаронида шуд.

 

Аксҳо аз АМИТ  «Ховар»

Июль 31, 2021 09:10

Хабарҳои дигари ин бахш

Ҳайати соҳибкорони Амрико ба Тоҷикистон меояд
КИРМАКПАРВАРӢ. Хоҷагиҳои ноҳияи Рашт истеҳсоли 21 тонна пиллаи хушсифатро ба нақша гирифтаанд
Дар филиали Корхонаи воҳиди давлатии «Тоҷикаэронавигатсия» дар шаҳри Кӯлоб низоми нави АПР DF 2000 ҷорӣ карда мешавад
Дар Душанбе Форуми тиҷоратӣ ва сармоягузории Тоҷикистону Чин баргузор шуд
Дар Остона ҷаласаи 4-уми вазирони энергетикаи давлатҳои аъзои Созмони ҳамкории Шанхай баргузор шуд
Имрӯз таҳти раёсати Сарвазири Тоҷикистон Қоҳир Расулзода ҷаласаи солонаи саҳмдорони Неругоҳи барқи обии «Роғун» баргузор шуд
Дар Душанбе масъалаи кумаки бебозгашти техникии Чин ба Хадамоти гумруки Тоҷикистон баррасӣ гардид
Сокини ноҳияи Ҷайҳун аз замини наздиҳавлигиаш ҳосили сеюми бананро ҷамъоварӣ мекунад
Дар Душанбе оид ба дурнамои рушди энергетикаи барқароршаванда дар Тоҷикистон конференсия баргузор мешавад
Имсол корхонаи «Оби зулол»-и шаҳри Истаравшан ҳаҷми содироти маҳсулотро зиёд намудааст
НАМОИШГОҲИ БАЙНАЛМИЛАЛИИ САВДО «СУҒД-2024».Дар он молу маҳсулоти 200 корхонаю ширкатҳои истеҳсолӣ муаррифӣ гардид
Конфронси Гурӯҳи корӣ оид ба ҳамкории авиатсияи граждании Чин ва Осиёи Марказӣ (C5+1) баргузор гардид