Вазири корҳои дохилӣ бо варзишгарони дастаи мунтахаби шиноварии Тоҷикистон вохӯрӣ намуд

ДУШАНБЕ, 13.07.2021 /АМИТ «Ховар»/. 12 июл Вазири корҳои дохилӣ, генерал-полковники милитсия Рамазон Раҳимзода, ки ҳамзамон Раиси Федератсияи шиноварии Ҷумҳурии Тоҷикистон мебошад, бо намояндагони дастаи мунтахаби мамлакат оид ба шиноварӣ ва варзишгароне, ки ба  Олимпиадаи батаъхирафтодаи шаҳри Токиои Япония-2020 роҳхат гирифтаанд, суҳбат намуд. Дар ин бора аз Вазорати корҳои дохилии Ҷумҳурии Тоҷикистон ба АМИТ «Ховар» итттилоъ доданд.

Дар мулоқот котиби генералии Федератсияи шиноварии ҷумҳурӣ Муҳаммадшо Абдуллозода, сармураббии дастаи мунтахаби Тоҷикистон оид ба шиноварӣ Муҳаммад Табаров ва варзишгарони шиновар Анастасия Тюрина ва Олимҷон Ишанов, ки барои  иштирок дар Олимпиадаи Япония — 2020 роҳхат гирифтаанд, ширкат доштанд.

Вазири корҳои дохилӣ Рамазон Раҳимзода варзишгаронро ба омодагии ҷиддӣ дидан ва дар сатҳи баланд нишон додани маҳорату малакаи касбии хеш дар ин мусобиқаи муҳими варзишии сатҳи ҷаҳонӣ ҳидоят намуд. Изҳори боварӣ карда шуд, ки варзишгарони шиновари кишварамон дар олимпиада сазовор баромад намуда, бо ишғоли мақомҳои ифтихорӣ номбардори давлату Ватани хеш мегарданд.

Дар фарҷоми вохӯрӣ варзишгарон аз ҷониби Вазири корҳои дохилӣ бо маблағҳои пулӣ сарфароз гардонида шуданд.

АКС аз Вазорати корҳои дохилии Ҷумҳурии Тоҷикистон