Дар Душанбе фаъолияти ширкати «Шивер Интернешнл»-и фаронсавӣ баррасӣ гардид

ДУШАНБЕ, 03.09.2021 /АМИТ «Ховар»/. 3 сентябр мулоқоти  муовини Вазири корҳои хориҷии Ҷумҳурии Тоҷикистон Шараф Шерализода бо роҳбари ширкати «Шивер Интернешнл» Винсент Пик баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар мулоқот ҷонибҳо доир ба фаъолияти ширкат дар Тоҷикистон, имконияти густариши самтҳои фаъолият ва дигар масъалаҳои мавриди таваҷҷуҳи тарафайн бо дарназардошти паёмадҳои ҳамагирии COVID-19 табодули афкор намуданд.

Бояд таъкин намуд, ки соли 2016 дар шаҳари Душанбе Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бузургтарин Маркази тиҷоратии «Душанбе мол»-ро ифтитоҳ намуд.

Ҳиссаи назарраси масоҳати Маркази тиҷоратӣ ба ташкили гипермаркети «Ашан» рост меояд. Бо даъвати соҳибкорони ватанӣ роҳбарияти ширкати фаронсавии «Шивер Интернейшнл» гипермаркети нахустини «Ашан»-ро дар Осиёи Марказӣ, дар Тоҷикистон ифтитоҳ намуд. Ҷамъияти Саҳҳомии Пӯшидаи «SchieverTadjikistan» моҳи июни соли 2014 аз ҷониби ҶСП «Евразия», Бонки аврупоии таҷдид ва рушд ва Ширкати оилавии фаронсавии «SchieverInternational» таъсис ёфт.

Мавриди зикр аст, ки ин ширкат нуфузи ҷаҳонӣ дошта, дар кишварҳои гуногун зиёда аз 3000 маркази савдо – гипермаркет дорад. Барои таъмини фаъолияти гипермаркети «Ашан» дар Маркази савдои Душанбе-мол то 400 ҷойи кории нав ва зиёда аз 70 ҷойи корӣ барои раёсати идоракунӣ ташкил карда шуд.

АКС аз ВКХ ҶТ