«БА ДӮСТАТ КИТОБ ҲАДЯ НАМО! ». Сафири Русия аз гимназияи ба номи Пушкини ноҳияи Рудакӣ дидан кард

Октябрь 22, 2021 11:32

ДУШАНБЕ, 22.10.2021 /АМИТ «Ховар»/.  Сафири Русия дар Тоҷикистон Игор Лякин-Фролов аз гимназияи тоҷикӣ-русии ба номи А.С.Пушкин, ки дар ноҳияи Рӯдакӣ воқеъ аст, дидан намуд. Зимни боздид ба хонандагони тоҷик аз ҷониби ҳамсолони русашон китобҳо ба забони русӣ туҳфа гардиданд. Дар чорабинӣ муовини раиси ноҳияи Рӯдакӣ Муҳаммадшариф Бобошоҳзода ва сардори  Раёсати маорифи ноҳия Соҳибназар Сафаров иштирок намуданд.

Дар гимназия таҳсил бо ду забон: тоҷикӣ ва русӣ ба роҳ монда шудааст. Ба гуфтаи директори гимназия Ҷамшед Маҷидов, дар мактаб беш аз 60 фисади таҳсилкунандагон дар синфҳои омӯзишашон ба забони русӣ таҳсил мекунанд.

Сафир дар дарсҳои забони русӣ, адабиёт ва мусиқии синфҳои чоруму нуҳум иштирок намуд. Наврасон аз эҷодиёти А.С. Пушкин шеърҳо хонда, оид ба ҳаёту фаъолияти эҷодии ӯ нақл намуданд.

Пас аз боздид аз синфҳо меҳмононро туҳфаи махсус- барномаи консертии аз ҷониби хонандагони гимназия таҳияшуда интизор буд. Махсусан сурудҳои халқии русӣ, ки яке аз хонандагон онҳоро бо асбоби миллӣ иҷро намуд ва рақси халқии русии “Валенки” хеле хотирмон буд.

Дар оғози суханронӣ Игор Лякин-Фролов иброз намуд, ки Русия ва Тоҷикистонро риштаҳои дӯстии чандинсола ва ҳамкории зич мепайванданд. Русия яке аз шарикони асосии стратегии Тоҷикистон ба шумор меравад. Яке аз омили муҳим дар рушди муносибатҳо миёни ин ду кишвар забони русӣ мебошад. “Хурсандиовар аст, ки дар гимназияи шумо забони русиро дӯст медоранд ва меомӯзанд, ки бо  ин роҳ мақоми ин забонро дар Тоҷикистон метавон устувор гардонд”,- гуфт сафир ва афзуд, ки бо ташаббуси сарони ду кишвар ҳоло дар Тоҷикистон сохтмони 5 мактаби русӣ идома дорад.

“Дар мавриди иқдоми “Ба дӯстат китоб ҳадя намо”, ки дар доираи он мо бо шумо вохӯрдем, бояд зикр намоям, ки ин ташаббус аз ҷониби хонандагони русиягии вилояти Свердловск андешида  шудааст. Наврасон барои дӯстони тоҷики худ тақрибан 10 ҳазор китобро бо мактубҳои шахсии худ ҷамъоварӣ намуданд. Ба дӯши мо танҳо вазифаи ифтихории супоридани ин китобҳо ба мактабҳои Тоҷикистон гузошта шудааст, ки имрӯз гимназияи шумо аз ин ҳисоб  600 китобро қабул мекунад”,- иброз дошт Сафири Русия.

Октябрь 22, 2021 11:32

Хабарҳои дигари ин бахш

«ПРЕЗИДЕНТ – ҲОМИИ МИЛЛАТ». Таҳти чунин унвон дар Китобхонаи миллии Тоҷикистон ҳамоиш доир шуд
Аз номи Сергей Лебедев барои дар сатҳи баланд баргузор намудани Анҷумани VI омӯзгорон ва кормандони маорифи кишварҳои ИДМ дар Душанбе номаи сипос расид
«Маҳмуднома». Таҳти чунин унвон доир ба фаъолияти Ҳомид Маҳмудов китоб ба нашр расидааст
«ТОҶИКОН» ДАР ХОНАДОНИ МАН» . Таҳти чунин унвон дар шаҳри Турсунзода озмуни зеҳнӣ доир шуд
Шоираи Раҳимҷон дар ҷамъбасти Фестивали 5-уми адабии Авруосиёии Лиффт-2021 ҷоизаи «Занон барои сулҳ»-ро соҳиб шуд
ХАБАРИ ХУШ! Номинаҳои 2500-солагии шаҳраки қадимаи Тахти Сангин ва 1050-солагии Абурайҳони Берунӣ ба Феҳристи ҷашнвораҳои ЮНЕСКО барои солҳои 2022-2023 шомил гардиданд
ТАСС: Вазорати маориф ва илми Тоҷикистон ба Русия пешниҳод намудааст, ки китобҳои дарсии забони русиро ба мактабҳо мутобиқ созад
«Пешвои миллат ва таҳкими нуфузи байналмилалии Тоҷикистон», — шарҳи матбуоти даврии Тоҷикистон
ЁДГОРИИ МЕЪМОРИИ МАНСУБ БА ДАВРАИ АНТИҚА. Бостоншиносони Тоҷикистон ва Фаронса аз пойсутун ва ҷузъи сутуни деҳаи Пушинги Данғара дидан намуданд
Гулчеҳра Қоҳирова: Астероиди 4660 Nereus барои Замин ягон хатар надорад
РУСИЯ ҚОИДАҲОИ НАВИ ИМЛОИ ЗАБОНИ РУСИРО ТАҲИЯ НАМУД. Қаблан ба қоидаҳои имлои забони тоҷикӣ низ тағйирот ворид шуда буд
Мактаб-интернати ҷумҳуриявии кӯдакони ятим дар шаҳри Кӯлоб ба давраи зимистон омода мебошад