ФУТЗАЛ. Дастаҳои «Соро компания»-и Душанбе ва «Сипар»-и Хуҷанд бо ҳам рақобат карданд

ДУШАНБЕ, 18.10.2021 /АМИТ «Ховар»/. Бозии дуюми финалии Лигаи касбии футзали Тоҷикистон-2021 миёни дастаҳои «Соро компания»-и шаҳри Душанбе  ва «Сипар»-и шаҳри Хуҷанд  ба фоидаи дастаи «Соро компания»-и шаҳри Душанбе  хотима ёфт,  иттилоъ дод  шореҳи варзиши АМИТ «Ховар» Меҳрони Қурбон  бо истинод ба Федератсияи футболи Тоҷикистон.

Дар ҷараёни бозӣ футзалбозони дастаи  «Сипар»-и шаҳри Хуҷанд  бо ҳисоби 2:0 пешсаф буданд, аммо натавонистанд натиҷаи мазкурро то ба охир нигоҳ доранд. Дар идомаи рақобат дастаи футзали  «Соро компания»-и шаҳри Душанбе  натиҷаро 2:2 кард. Дар зарбаи пеналти ин дафъа бахт ба рӯи  дастаи футзали  «Соро компания» хандид (5:3). Беҳтарин бозингари вохӯрӣ дарвозабони эронии дастаи футзали  «Соро компания»-и шаҳри Душанбе Маҳдии Мустафо буд, ки зарбаи ҷаримавии аз ҷониби бозингари «Сипар» Алишер Сафаров задаро бартараф кард.

Акнун пас аз ду бозӣ ҳисоб дар силсилаи ниҳоӣ баробар аст – (1:1). Ду бозии навбатӣ байни дастаҳои футзали  «Соро компания»-и шаҳри Душанбе  ва «Сипар»-и шаҳри Хуҷанд  23-24 октябр дар маҷмааи варзишии «Қасри Варзиш» -и  шаҳри Хуҷанд баргузор мешаванд.

Лигаи миллии касбии футзали Тоҷикистон-2021

Финал. Бозии дуюм

«Соро компания» (Душанбе) – «Сипар» (Хуҷанд) – 2:2. Аз пеналти – 5:3

Голҳо: Шоҳрух Шамидов, 28 (0:1). Парвиз Раҳматов, 33 (0:2). Муҳаммад Шарипов, 35 (1:2). Муҳсин Муҳаммадзода, 40 –пеналти (2:2).

Силсилаи пеналти: Алӣ Микоилӣ – 1:0. Алишер Сафаров – 1:0 (дарвозабон). Муҳаммад Шарипов – 2:0. Ваҳтанг Кекелия – 2:1. Муҳсин Муҳаммадзода – 3:1. Рустам Ҳамидов – 3:2. Руҳулло Исорӣ – 4:2. Иван Бахур – 4:3. Фирӯз Сангов – 5:3.

                                                                 АКС аз Федератсияи футболи Тоҷикистон