Пешвои миллат Эмомалӣ Раҳмон корхонаи истеҳсоли халтаҳои полипропиленӣ дар ноҳияи Мир Сайид Алии Ҳамадониро ифтитоҳ намуданд

Октябрь 1, 2021 09:30

ДУШАНБЕ, 01.10.2021 /АМИТ «Ховар»/. 1 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти «Қаҳрамон»-и ноҳияи Мир Сайид Алии Ҳамадонӣ корхонаи истеҳсоли халтаҳои полипропилении Ҷамъияти дорои масъулияти маҳдуди «Мирзо Раҷаб»-ро ифтитоҳ намуданд.

Корхонаи нави саноатӣ дар доираи тадбирҳои созандагӣ ба ифтихори 30-солагии Истиқлолияти давлатии Ҷумҳурии Тоҷикистон ва татбиқи ҳадафи чоруми миллӣ — саноатикунонии босуръати кишвар аз тарафи соҳибкори ватанӣ Ҷиёнхон Мирзоев бо харҷи 1,7 миллион сомонӣ бунёд гардидааст.

Бо таъсиси корхонаи мазкур 26 сокини маҳаллӣ бо ҷойи кори доимӣ ва маоши хуб таъмин шуданд.

Дар корхона чор хати муосири технологӣ, ки аз Федератсияи Русия ва Ҷумҳурии Мардумии Чин ворид гардидаанд, васлу насб шуда, 10 намуд  халтаҳои полипропиленӣ бо андозаҳои гуногун истеҳсол карда мешаванд. Тамоми номгӯи маҳсулоти истеҳсолшаванда аз лиҳози намуд ва сифат ба меъёрҳои байналмилалӣ ҷавобгӯ мебошад.

Сарвари давлат муҳтарам Эмомалӣ Раҳмон зимни шиносоӣ бо фаъолияти корхонаи навбунёди истеҳсолӣ ба соҳибкори маҳаллӣ барои  ҷонибдорӣ аз сиёсати пешгирифтаи Ҳукумати мамлакат ҷиҳати ба шуғли доимӣ ҷалб кардани сокинон ва ба ин восита баланд бардоштани сатҳи некуаҳволии мардум изҳори сипос намуданд.

Иттилоъ дода шуд, ки иқтидори истеҳсолии корхона дар як шабонарӯз аз 1500 то 2000 дона халтаҳои полипропиленӣ мебошад, ки солона зиёда аз 600 ҳазор ададро ташкил медиҳад.

Дар корхона ашёи хом — полипропилен аз Федератсияи Русия ва ҷумҳуриҳои Узбекистону Қазоқистон дар асоси шартномаи ҳамкорӣ дастрас гардида, то марҳилаи ниҳоӣ коркард мешавад.

Айни замон халтаҳои полипропилении истеҳсоли ин корхона дар бозор, марказҳои савдову хизматрасонӣ, мағозаҳо ва дигар нуқтаҳои фурӯши молҳои саноатӣ ва масолеҳи сохтмонӣ ба таври васеъ истифода мегарданд. Халтаҳои полипропилении калонҳаҷм асосан барои маҳсулоти хӯрокворӣ ва кишоварзӣ пешбинӣ шудааст.

Коргарон нақша доранд, ки дар баробари таъмини талаботи бозорҳои дохилӣ истеҳсолотро бештар карда, содироти ин навъи маҳсулоти ватаниро ба кишварҳои ҳамсоя низ ба роҳ монанд. Ҳадаф аз бунёди корхонаи истеҳсоли халтаҳои полипропиленӣ дар ноҳияи Мир Сайид Алии Ҳамадонӣ тақвияти иқтидори истеҳсолии шаҳру ноҳияҳои минтақаи Кӯлоби вилояти Хатлон мебошад.

Пас аз шиносоӣ бо ҷараёни истеҳсолот дар корхонаи нав Пешвои миллат муҳтарам Эмомалӣ Раҳмон аз намоиши маҳсулоти саноатӣ, хӯрокворӣ ва сохтмонӣ, ки аз ҷониби саноатчиёни ноҳия ташкил карда шудааст, дидан карданд.

Дар намоиш намаки ошии ёддор, равғани растанӣ, меваю сабзавоти консервашуда ва масолеҳи гуногуни сохтмонӣ муаррифӣ карда шуд.

Таъкид гардид, ки айни замон дар ноҳияи Мир Сайид Алии Ҳамадонӣ зиёда аз 68 корхонаи саноатӣ амал мекунанд, ки ба истеҳсоли маҳсулоти гуногун, аз қабили орду равған, намак, коркарди меваю сабзавот ва дигар навъи маҳсулоти зарурии рӯзгор машғул мебошанд.

Ҳиссаи соҳаи саноат ба иқтисодиёти ноҳия назаррас буда, ҳамасола бо таъсис ва фаъолияти босамари коргоҳу корхонаҳои нав ҳаҷми маҳсулоти истеҳсолӣ афзоиш меёбад.

Ифтитоҳи корхонаи истеҳсоли халтаҳои полипропиленӣ дар ноҳияи Мир Сайид Алии Ҳамадонӣ 01.10.2021

Октябрь 1, 2021 09:30

Хабарҳои дигари ин бахш

35-СОЛАГИ ИСТИҚЛОЛИ ДАВЛАТӢ. Дар Ховалинг таъмиру навсозии беш аз 200 иншоот ба нақша гирифта шудааст
Сокинони маҳаллаи Наврӯзи шаҳри Бӯстон бо оби нӯшокӣ таъмин гардиданд
Дар ҳудуди шаҳри Гулистон сохтмони меҳмонхона ва осоишгоҳу марказҳои солимгардонӣ идома доранд
Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд