Президенти мамлакат Эмомалӣ Раҳмон Муассисаи таълимии рақами 42-и ноҳияи Мир Сайид Алии Ҳамадониро ифтитоҳ намуданд

Октябрь 1, 2021 07:57

ДУШАНБЕ, 01.10.2021 /АМИТ «Ховар»/. 1 октябр дар идомаи сафари корӣ дар ноҳияи Мир Сайид Алии Ҳамадонӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бинои Муассисаи таҳсилоти миёнаи умумии рақами 42-и ноҳияро мавриди истифода қарор доданд.

Мактаби нави деҳаи Навободи деҳоти Меҳнатободи ноҳия бо дастгирии Ҳукумати Ҷумҳурии Тоҷикистон аз тарафи Муассисаи давлатии «Маркази татбиқи лоиҳаи «Сохтмон ва муҷаҳҳазгардонии мактабҳо» бунёд гардидааст.

Иншооти мазкур аз 2 ошёна, 13 синфхона, 2 ҳуҷраи корӣ ва китобхона иборат буда, дар он 528 нафар хонанда дар ду баст ба таҳсил фаро гирифта мешаванд.

Президенти Ҷумҳурии Тоҷикистон муҳтарам Эмомалӣ Раҳмон дар бинои нави муассисаи таҳсилоти миёнаи умумии рақами 42 аз шароити синфхонаҳои таҳсилоти ибтидоӣ, омӯзиши технологияи компютерӣ, китобхона ва кабинетҳои фаннӣ дидан намуданд.

Синфхонаи омӯзиши технологияи компютерии ин муассисаи таълимӣ бо 24 адад компютери муосиру тахтаи электронӣ, кабинетҳои фанни химия, биология, физика ва китобхонаи мактаб пурра бо лавозимоти зарурӣ ва аёнияти хониш ҷиҳозонида шудаанд.

Сарвари давлат муҳтарам Эмомалӣ Раҳмон ба сифати корҳои сохтмонӣ дар бинои нави муассисаи таълимӣ ва таъмини он бо шароити замонавии донишандӯзӣ баҳои баланд дода, хонандагонро ба омӯзиши ҳарчи бештари барномаи таълимӣ, аз ҷумла фанҳои дақиқ, ширкат дар озмунҳои фаннӣ, мутолиаи китобу асарҳои бадеӣ иштирок дар озмунҳои ҷумҳуриявии “Фурӯғи субҳи доноӣ китоб аст” ва “Илм — фурӯғи маърифат” ҳидоят намуданд.

Дар муассисаи таҳсилоти миёнаи умумии рақами 42-и деҳаи Навободи деҳоти Меҳнатободи ноҳияи Мир Сайид Алии Ҳамадонӣ айни замон 485 хонанда ба таҳсил фаро гирифта шудаанд. Барои беҳтар намудани шароити таълиму тарбия дар асоси татбиқи сиёсати маорифпарваронаи Президенти мамлакат дар баробари бунёди муассисаи нави таълимӣ бинои пештараи мактаби рақами 42, иборат аз 11 синфхона пурра аз таъмири асосӣ бароварда шудааст.

Бинои нави муассисаи таълимӣ бо шабакаи мустақили гармидиҳӣ пайваст буда, дар шафати он майдончаи хурди варзишӣ барои ташкили машғулияти тарбияи ҷисмонӣ ва омодагии дифои ҳарбӣ бунёд гардидааст.

Иттилоъ дода шуд, ки дар ноҳияи Мир Сайид Алии Ҳамадонӣ барои рушди соҳаи маориф ва беҳдошти сатҳи таълим, таъмини ҷойҳои нишасти хонандагон давоми солҳои соҳибистиқлолӣ бо дастгирии Ҳукумати Ҷумҳурии Тоҷикистон беш аз 20 муассисаи нави таълимӣ  мавриди истифода қарор дода шудаанд.

Президенти Ҷумҳурии Тоҷикистон муҳтарам Эмомалӣ Раҳмон омӯзгорон ва аҳли маорифи ноҳияро вазифадор намуданд, ки ба кори таълиму тарбия таваҷҷуҳи бештар зоҳир карда, хонандагонро дар рӯҳияи ватандӯстӣ ва ифтихори миллӣ ба камол расонанд.

Ифтитоҳи Муассисаи таълимии рақами 42-и ноҳияи Мир Сайид Алии Ҳамадонӣ 01.10.2021

Октябрь 1, 2021 07:57

Хабарҳои дигари ин бахш

35-СОЛАГИ ИСТИҚЛОЛИ ДАВЛАТӢ. Дар Ховалинг таъмиру навсозии беш аз 200 иншоот ба нақша гирифта шудааст
Сокинони маҳаллаи Наврӯзи шаҳри Бӯстон бо оби нӯшокӣ таъмин гардиданд
Дар ҳудуди шаҳри Гулистон сохтмони меҳмонхона ва осоишгоҳу марказҳои солимгардонӣ идома доранд
Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд