«СЕ ШОҲКОР». Романҳои оламшумули нависандагони машҳури ҷаҳонӣ бо забони тоҷикӣ нашр шуданд

Октябрь 17, 2021 08:52

ДУШАНБЕ, 17.10.2021 /АМИТ «Ховар»/. Чанде қабл дар толори Иттифоқи нависандагони Тоҷикистон маҳфили муаррифии китоби тозанашри «Се шоҳкор», ки романҳои оламшумули нависандагони машҳури ҷаҳонӣ – «Шодравон Маттиа Паскал»-и Луиҷи Пиранделло, «Гетсбии муаззам»-и Френсис Скот Фитсҷералд ва «Гурги даштӣ»-и Ҳерман Ҳессеро дар тарҷумаи шоир, нависанда ва тарҷумони шинохтаи тоҷик Салими Зарафшонфар дарбар гирифтааст, баргузор гардид. Дар ин маҳфил аҳли илму адаб ва алоқамандону дӯстдорони адабиёти ҷаҳон ширкат доштанд, хабар доданд ба АМИТ «Ховар» аз Иттифоқи нависандагони Тоҷикистон.

Муовини раиси Иттифоқи нависандагони Тоҷикистон  Равшан Махсумзод дар бораи романҳои мазкур ва заҳмату кӯшиши тарҷумон дар баргардони он ба забони тоҷикӣ сухан гуфт. Мавсуф зикр кард, ки ин романҳо аз ҷумлаи асарҳои машҳуртарин ва серхонандатаринеанд, ки ба аксар забонҳои дунё тарҷума шудаанд.

«Тарҷумаи ин романҳо ба забони тоҷикӣ кори сангину душвор аст ва на ба ҳар тарҷумон муяссар мегардад. Аз ин хотир кори Салими Зарфшонфар шоистаи пазироӣ ва қадрдонии хос аст», — гуфт ӯ.

Зикр шуд, ки «Се шоҳкор» яке аз дастовардҳои муҳими тарҷумаи бадеии мо дар солҳои охир ба ҳисоб меравад.

Дар бораи хусусиятҳои тарҷумаи «Се шоҳкор» ва заҳмату кӯшиши тарҷумон адибону  адабиётшиносон  Кароматуллоҳи Мирзо, Ато Ҳамдам, Абдуғаффори Абдуҷаббор, Муртазо Зайниддинзода, Сироҷиддин Икромӣ, Абдураҳмон Абдуманнон ва дигарон изҳори назар карданд.

Дар фарҷом мудири бахши робитаҳои адабӣ ва тарҷумаи Иттифоқи нависандагони Тоҷикистон  Абдуллоҳи Раҳнамо дар бораи тарҷума ва нашри китоби мавриди назар ва аҳамияти он сухан гуфт.

Мавриди зикр аст, ки фаъолияти тарҷумонии Салими Зарафшонфар чун фаъолияти шоириву носирии ӯ доманадор буда, хонандагони тоҷик аз тарҷумаҳои зиёди ӯ аз адабиёти дунё баҳравар шудаанд. То кунун аз сӯи ин адиби пуркору заҳматкаш асарҳои «Ҷейн Эйр»-и Шарлотта Бронте, «Гора»-и Р. Такур, «Дастпонаи ақиқнигин»-и А. Куприн, «Дӯсти Дилнавоз»-и Г. Д. Мопассан, «Саҳифаи муҳаббат»-и Э. Золя, «Марианна»-и П. Лагер Квист, «Обхези найсон»-и И. С. Тургенев, ҳикояҳои Акутагава, О. Генри ва дигар асарҳои мансуру манзум дар сатҳи баланд тарҷума шудаанд.

Октябрь 17, 2021 08:52

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад