47,3%-и шаҳрвандони Тоҷикистон бо ваксинатсия зидди бемории COVID-19 фаро гирифта шуданд

ДУШАНБЕ, 13.11.2021 /АМИТ «Ховар»/. То 12 ноябр дар ҳудуди Ҷумҳурии Тоҷикистон 2 миллиону 758 ҳазору 384 нафар (47,3%)  шаҳрвандони мамлакат ба ваксинатсия зидди бемории COVID-19 фаро гирифта шуданд. Инчунин вояи дуюми ваксинаро то ин сана  2 миллиону 265 ҳазору 815 нафар (38,9%) шаҳрвандони мамлакат гирифтаанд, иттилоъ доданд аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар».

Маъракаи иммунизатсия миёни аҳолии пойтахти ҷумҳурӣ — шаҳри Душанбе 100,4% иҷро гардидааст.

Имрӯзҳо сокинони мамлакат бо масъулияти баланд баҳри ҳифзи саломатии худ ва наздиконашон ба муассисаҳои тандурустии маҳалли зисти хеш муроҷиат намуда, ваксинаи зидди COVID-19 гирифта истодаанд.

Тибқи қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 дар Ҷумҳурии Тоҷикистон, ки 3 июл ба нашр расид, ваксинаи зидди бемории сироятии коронавирус барои шаҳрвандони аз 18-сола боло ҳатмӣ мебошад. Нафароне, ки ваксинаи зидди бемории сироятии коронавирус нагирифтаанд, ҳатман ба табибони оилавӣ ва ё ба муассисаҳои тандурустии маҳали зисташон муроҷиат намоянд. Ваксина ба шаҳрвандони мамлакат тариқи ройгон гузаронида мешавад.

АКС аз Вазорати тандурустӣ ва ҳифзи иҷтимоии аҳолии ҶТ