Конститутсияи Тоҷикистон барои сулҳу субот ва ваҳдати миллӣ асоси боэътимод гузошт

ДУШАНБЕ, 05.11.2021 /АМИТ «Ховар»/. Имрӯз дар Донишкадаи давлатии фарҳанг ва санъати Тоҷикистон ба номи Мирзо Турсунзода ҳамоиши тантанавӣ бахшида ба Рўзи Конститутсияи Ҷумҳурии Тоҷикистон баргузор гардид.
Тавре аз донишкада ба АМИТ “Ховар” иттилоъ доданд, ректори Донишкадаи давлатии фарҳанг ва санъати Тоҷикистон ба номи Мирзо Турсунзода, доктори илмҳои филологӣ, профессор Муҳриддин Низомӣ сухан карда, иброз дошт, ки Конститутсияи Ҷумҳурии Тоҷикистон маҳз ба шарофати андешаву ҳувияти миллӣ, таҳаммулгароӣ ва ҷасорату матонати сиёсии мардуми дорои маърифати баланди ҳуқуқӣ қабул гардида, барои устувории пояҳои давлати мустақил мусоидат намуд. Бо қабули Конститутсия майлу иродаи халқи Тоҷикистон оид ба эъмори давлати демокративу ҳуқуқбунёд ва дунявию иҷтимоӣ, ки дар бобати интихоби сарнавишти минбаъдаи кишвар имтиҳони ҷиддие буд, муайян гардид.
Зикр гардид, ки Конститутсияи Ҷумҳурии Тоҷикистон ба сифати қонуни асосӣ заминаҳои ҳуқуқии давлат, дахлнопазирӣ ва якпорчагии он, манфиатҳои миллӣ, ҳадафҳои сиёсати дохиливу хориҷӣ ва асосҳои иқтисодиву иҷтимоии ҷомеаи Тоҷикистонро муайян сохт ва муҳимтар аз ҳама, инсон ва ҳуқуқу озодиҳои ўро арзиши олӣ эътироф намуда, барои инкишофи минбаъдаи муносибатҳои нави ҷамъиятӣ роҳи васеъ кушод.
Ба гуфтаи ректори донишкада, ин санади муқаддас сохти давлатдорӣ ва низоми ҳаёти ҷомеаи нави Тоҷикистонро муайян намуда, ба сулҳу субот ва ваҳдати миллӣ дар мамлакатамон асоси боэътимод гузошт. Он заминаҳои асосии сохтори давлатӣ ва низоми сиёсиро тағйир дода, тарзи идоракунии авторитариро ба рақобати озоди сиёсӣ ва муколама иваз намуд, дар баробари ин, барои густариши ҷомеаи шаҳрвандӣ шароити мусоид фароҳам овард.
Муҳриддин Низомӣ таъкид кард, ки ин санади олии ҳуқуқӣ бояд мавриди омӯзиши дақиқи тамоми қишрҳои ҷомеа, аз ҷумла устодону донишҷўёни донишкада қарор гирад, то тавонем насли ҷавонро дар рӯҳияи эҳтиром ба он тарбия намуда, волоияти қонунро таъмин созем. Зеро, ба гуфтаи Пешвои муаззами миллат муҳтарам Эмомалӣ Раҳмон «танҳо ҳамон миллате дар байни оламиён соҳиби обрӯ мегардад, ки Конститутсия ва қонунҳои худро эҳтиром ва риоя мекунад, танҳо ҳамон давлате нуфуз пайдо менамояд, ки шаҳрвандонаш сарфи назар аз мансубияти нажодӣ, миллӣ ва диниашон эҳтиром ва волоияти қонунро ба ҷо меоранд ва дар айни замон ба арзишҳои беҳтарини башарият арҷ мегузоранд».
Дар доираи таҷлили Рўзи Конститутсияи ҶумҳурииТоҷикистон маърўзаи илмӣ бо унвони «Пайдоиш» ва марҳилаҳои ташаккули Конститутсия дар Тоҷикистон ироа гардида, филми мустанади «Конститутсия-бахтномаи миллат» манзури иштирокдорони чорабинӣ гардонда шуд. Ҳамзамон, устодону донишҷўён шеърҳои «Давлати ман-Тоҷикистон», «Санои меҳр», «Ватан», «Ормон», «Тоҷикистон, эй Ватан» ва рақсҳои ҷолибро манзури аҳли нишаст гардонданд.
АКС аз Донишкадаи давлатии фарҳанг ва санъати Тоҷикистон