«Маҳмуднома». Таҳти чунин унвон доир ба фаъолияти Ҳомид Маҳмудов китоб ба нашр расидааст

ДУШАНБЕ, 15.11.2021 /АМИТ «Ховар»/. Бахшида ба 30-солагии Истиқлолияти давлатии Тоҷикистон таҳти унвони «Маҳмуднома»  аз ҷониби нашриёти «Истиқлол» китоби нав ба нашр расид, ки муаллифи он Баҳодур Маҳмудов мебошад.

Китоби «Маҳмуднома» доир ба фаъолияти ҳунарпеша ва коргардони тоҷику узбек, асосгузори ислоҳотгари театри тоҷик Ҳомид Маҳмудов нақл мекунад.

Китоби мазкур равияи тозае дар таҳқиқи таърихи театри замони пасошӯравӣ буда, барои донишомӯзон, санъатшиносон, фарҳангшиносон, мусиқишиносон, театршиносон ва дӯстдорони ҳунари зебои мамлакат тақдим мегардад.

Муаллиф дар китоб доир ба   ҳаёт ва фаъолияти эҷодии бунёдгузори театри касбии тоҷик Ҳомид Маҳмудов арзишҳои нави маънавию башардӯстиро сабт намуда, солномаи робитаҳои театрҳои Русия, Тоҷикистон ва Узбекистонро ба қалам додааст. Мавсуф нигоштааст, ки ширкати Ҳомид Маҳмудов дар раванди ташкили театри миллӣ на танҳо равияву ҷанбаҳои ҳар театрро муайян кард, балки ба инкишофи фаъолияти театрҳои маҳаллӣ, рушди касбии ҳунари драмаву мусиқӣ, мазҳака, опера ва балет низ мусоидат  намуд.

Ҳамчунин хонанда имкон дорад, ки аз китоби мазкур доир ба масъалаҳои таърихии марбут ба пойтахти давлати Сомониён — Бухоро, тарзи ҳаёти иҷтимоиву сиёсӣ дар асрҳои XIX-XX маълумот пайдо намояд.

Китоби мазкур аз панҷ боб иборат буда, ҳар кадоме пурра ба ҳаёти Ҳомид Маҳмудов бахшида шудааст. Китоб бо ду забон-тоҷикӣ ва русӣ нашр гардидааст.

АКСҲО: АМИТ «Ховар»