НБО «Помир-1»-и ноҳияи Шуғнон ба давраи зимистон пурра омода мебошад

ДУШАНБЕ, 22.11.2021 /АМИТ «Ховар»/. Раиси ноҳияи Шуғнон Ҷумъа Ҷумъазода зимни сафари корӣ дар Ҷамоати деҳоти Сучон аз фаъолияти истеҳсолии Неругоҳи барқи обии «Помир-1» ва ҷараёни омодагии он ба мавсими зимистон дидан намуда, бовар ҳосил намуд, ки неругоҳ барои гузаронидани давраи зимистон пурра омода аст, хабар медиҳад АМИТ “Ховар” бо истинод ба мақомоти иҷроияи ҳокимияти давлатии ноҳия.

Зимни суҳбат масъулини неругоҳ иброз намуданд, ки ҷиҳати сари вақт тайёр намудани таҷҳизоти барқӣ таъмири ҷории агрегатҳо, трансформаторҳо, ташхиси тепловизионии ҳамаи таҷҳизоти барқӣ ва захираи миқдори зарурии турбинӣ иҷро шуда, бо боварӣ метавон гуфт, ки неругоҳ барои гузаронидани фасли зимистон пурра омода мебошад.

Раиси ноҳия ба шахсони мутасаддии шабакаҳои барқии ноҳия дастур дод, ки ҷиҳати ҳалли баъзе камбудиҳои ҷойдошта дар самти зимистонгузаронӣ сари вақт чораҳои зарурӣ амалӣ намоянд.

Роҳбарияти неругоҳ изҳори боварӣ намуд, ки кормандони Неругоҳи барқи обии «Помир-1» бо ҳисси масъулият ба ин масъала муносибат мекунанд ва мавсими зимистонро бе душворӣ паси сар хоҳанд кард.

АКС: МИҲД-и ноҳияи Шуғнон