«ТОҶИКОН» ДАР ХОНАДОНИ МАН» . Таҳти чунин унвон дар шаҳри Турсунзода озмуни зеҳнӣ доир шуд

ТУРСУНЗОДА, 14.11.2021. /АМИТ «Ховар»/. Дар шаҳри Турсунзода дар ҳамбастагӣ бо мақомоти иҷроияи ҳокимияти давлатии шаҳр ва Кумитаи иҷроияи ҲХДТ дар шаҳри Турсунзода бахшида ба Рӯзи Президенти Ҷумҳурии Тоҷикистон аз рӯи китоби безаволи аллома Бобоҷон Ғафуров таҳти унвони “Тоҷикон» дар хонадони ман” озмуни зеҳнӣ баргузор гардид, ки дар он 15 даста аз ташкилоти ибтидоии ҳизбии корхонаву идораҳои шаҳр,  ки ҳар даста тариқи рамзӣ аз китоби «Тоҷикон» номгузорӣ шуда буд, иштирок намуда, дар назди аъзои ҳакамон донишҳои омӯхтаи худро санҷиданд. Дар ин бора котиби матбуоти раиси шаҳри Турсунзода Фируз Холиқов ба хабарнигори АМИТ “Ховар” иттилоъ дод.

Дар ҷараёни озмуни мазкур раиси шаҳр Парвиз Акрамзода зикр намуд, ки «китоби «Тоҷикон» ба сифати шиносномаи миллат шинохта шуда, дар арсаи ҷаҳон тоҷиконро ҳамчун миллати қадимӣ, тамаддунофару соҳибфарҳанг, озодихоҳу истиқлолпарвар муаррифӣ менамояд. Аз ин лиҳоз ҳар яки мо вазифадорем, ки онро омӯхта, бо миллату ниёгони худ ифтихор намоем ва бо меҳнати пурсамару дониши мукаммал ҷиҳати муаррифии милллати худ кӯшиш ба харҷ диҳем».

Аъзои ҳакамон дастаи «Спитамен»-и ташкилоти ибтидоии ҳизбии «Роҳбар»-и мақомоти иҷроияи ҳокимияти давлатии шаҳри Турсунзодаро сазовори ҷои якум, дастаи «Ковиён»- и ташкилоти ибтидоии ҳизбии шуъбаи маорифро сазовори ҷои дуюм, дастаи «Хуросон»-и ташкилоти ибтидоии ҳизбии ҷамоати деҳоти 10-солагии Истиқлолият ва дастаи «Сомониён»-и Ҷамоати деҳоти Навободро ба ҷои 3-юм сазовор донистанд.

Ғолибони озмун бо Сипосномаи КИ ҲХДТ дар шаҳр ва мукофоти хотиравӣ қадрдонӣ гардиданд.

 АКСҲО аз Мақомоти иҷроияи шаҳри Турсунзода