ФУТЗАЛ. Рақибони дастаи мунтахаби Тоҷикистон дар Мусобиқаи интихобии Ҷоми Осиё-2022 муайян шуданд

ДУШАНБЕ, 07.01.2022 /АМИТ «Ховар»/. Рақибони дастаи мунтахаби Тоҷикистон дар марҳилаи интихобии Ҷоми Осиё-2022 оид ба футзал, ки 10-12 апрели имсол дар Бишкек баргузор мегардад, муайян шуданд. Дар натиҷаи қуръакашии мусобиқа дастаи мунтахаби   футзали Тоҷикистон  таҳти раҳбарии сармураббӣ Пайрав Воҳидов дар минтақаҳои муттаҳидшудаи Марказӣ ва Ҷанубии мусобиқаи интихобии Ҷоми Осиё-2022 ба гурӯҳи «B» шомил шуда, бо дастаҳои мунтахаби Узбекистон, Афғонистон ва Непал қувваозмоӣ мекунад. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Ба гурӯҳи «А» дастаҳои мунтахаби Эрон, Қирғизистон, Туркманистон ва Молдив шомил шуданд.

Дар асоси натиҷаи  марҳилаи интихобӣ аз минтақаи Ҷанубӣ ва Марказӣ ба финали Ҷоми Осиё-2022, ки аз 25  сентябр то 20  октябри соли  2022 дар Кувайт баргузор мешавад, аз ҳар гурӯҳ ду дастаи беҳтарин роҳ меёбанд.

Мусобиқаи интихобии Ҷоми Осиё-2022 оид ба футзал

Минтақаи Марказӣ ва Ҷанубӣ

Гурӯҳи А: Эрон, Кирғизистон, Туркманистон, Молдив

Гурӯҳи В: Узбекистон, ТОҶИКИСТОН, Афғонистон, Непал

АКС: Федератсияи футболи Тоҷикистон