АФЗОИШИ ММД ТОҶИКИСТОН РЕКОРДӢ ШУД. Давоми панҷ соли охир маҷмӯи маҳсулоти дохилӣ қариб 53 баробар ва буҷети давлатӣ 111 баробар афзудааст!

ДУШАНБЕ, 10.02.2022 /АМИТ «Ховар»/. Маҷмӯи маҳсулоти дохилӣ дар Тоҷикистон дар соли сипаригардида ба 98,9 миллиард сомонӣ (8,7 миллиард доллар) расид. Ҳамин тариқ, суръати рушди иқтисодӣ дар соли 2021 9,2 фоизро ташкил дод. Ин баландтарин суръати афзоиш дар 5 соли охир аст.

Қаблан иттилоъ дода шуда буд, ки шумораи аҳолии ҷумҳурӣ дар ин давра ба беш аз 9,8 миллион нафар расидааст. Дар натиҷа, ба ҳар сари аҳолӣ 10 ҳазору 52 сомонӣ аз ММД рост меояд. Ба ҳисоби доллар, маҷмӯи маҳсулоти дохилии Тоҷикистон ба ҳар сари аҳолӣ дар ин давра ҳудуди 890 долларро ташкил дод.

Дар соли сипаригардида ба қисми умумии даромади буҷети давлатӣ 29,5 миллиард сомонӣ ворид гардид. Ин маблағ аз нақшаи дар назар гирифта 1,3 миллиард сомонӣ бештар аст.

Даромади андозҳо ва пардохтҳои дохилӣ ба буҷети давлатӣ 13,7 миллиард сомониро дар бар гирифт, ки нисбат ба нишондиҳандаҳои пешбинишуда 101 миллион сомонӣ зиёд аст.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паёми навбатӣ ба Парлумони кишвар 21 декабри соли 2021 изҳор доштанд, ки маҷмӯи маҳсулоти дохилии кишвар аз 1,8 миллиард сомонии соли 2000 дар соли 2021 ба 95 миллиард сомонӣ расидааст. Ҳамин гуна, маҷмӯи маҳсулоти дохилӣ қариб 53 баробар ва буҷети давлатӣ 111 маротиба афзуд.

Ёдовар мешавем, ки ҳаҷми ММД-и ҷумҳурӣ соли 2020 ба 82 миллиарду 543 миллион сомонӣ баробар аст, ки ба ҳар сари аҳолӣ беш аз 8 ҳазору 740 сомониро ташкил дод. Дар соли 2019 — 77,3 миллиард сомонӣ ё 8 ҳазору 136 сомонӣ ба ҳар сари аҳолӣ буд. Ин нишондиҳанда соли 2018 ба 68 миллиарду 844 миллион сомонӣ расида ё ба ҳар сари аҳолӣ 7 ҳазору 565 сомониро ташкил додааст.

Вазири рушди иқтисод ва савдои Ҷумҳурии Тоҷикистон Завқӣ Завқизода ба АМИТ «Ховар» гуфт, ки афзоиши маҷмӯи маҳсулоти дохилӣ дар ин давра асосан аз ҳисоби афзоиши истеҳсоли маҳсулоти саноатӣ, гардиши савдои хориҷӣ ва сармоягузорӣ ба сармояи асосии кишвар сурат гирифт.

Роҳбари Вазорати рушди иқтисод ва савдо афзуд, ки бинобар сабаби пешгирӣ аз таъсири таҳдидҳои эҳтимолӣ ба иқтисоди миллӣ ва таъмини суботи макроиқтисодии кишвар стратегияи ҳифзи иқтисоди Тоҷикистон таҳия шудааст.

Қобили зикр аст, ки Президенти Тоҷикистон, Пешвои миллат муҳтарам Эмомалӣ Раҳмон солҳои 2022-2026-ро Солҳои рушди саноат эълон намуданд.

ДАР АКСИ БОЛО: Президенти Ҷумҳурии Тоҷикистон Эмомалӣ Раҳмон соли 2019 дар шаҳри Душанбе корхонаи истеҳсоли асфалту бетонро ифтитоҳ намуданд. Таҷҳизот аз Италия ва Туркия оварда шудааст. Иқтидори корхона 240 тонна асфалт дар як соатро ташкил медиҳад. Акс: Хадамоти матбуоти Президенти Ҷумҳурии Тоҷикистон / АМИТ «Ховар»