Дар Душанбе бахшида ба ҷашни Наврӯз Мусобиқаи байналмилалии гӯштингирӣ доир мешавад

ДУШАНБЕ, 28.02.2022. /АМИТ «Ховар»/. Аз 17 то 22 март дар Муассисаи давлатии «Наврӯзгоҳ»-и шаҳри Душанбе бахшида ба ҷашни байналмилалии Наврӯз-2022 Мусобиқаи 3-юми байналмилалӣ оид ба гӯштингирӣ миёни мардон ва бонувон барои дарёфти «Ҷоми Пойтахт» баргузор карда мешавад. Бо қарори Раиси шаҳри Душанбе Рустами Эмомалӣ аз 25 феврали соли 2022 барои баргузории ин мусобиқаҳо маблағи 2 миллион сомонӣ бо дарназардошти андозҳо ҷудо гардид.

Тавре дар шуъбаи иттилоотии дастгоҳи Раиси шаҳри Душанбе ба АМИТ «Ховар» хабар доданд, мусобиқаи мазкур дар доираи баргузор намудани Чемпионати Осиё оид ба кураш доир шуда, бо мақсади ташвиқу тарғиб ва рушду равнақи варзиш, таъмини оммавияти варзишу солимгардонӣ доир карда мешавад.

Тибқи қарори мазкур, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Федератсияи миллии гӯштингирии Ҷумҳурии Тоҷикистон ба ин мусобика беҳтарин варзишгарони кишварҳои хориҷӣ ва варзишгарони шаҳру ноҳияҳои ҷумҳуриро даъват ва ҷалб менамоянд.

АКС аз бойгонии АМИТ «Ховар»