Дар Душанбе масъалаи татбиқи лоиҳаҳо оид ба тағйирёбии иқлим баррасӣ гардид

ДУШАНБЕ, 19.02.2022 /АМИТ «Ховар»/. Лоиҳаҳои амалӣ ва ба нақша гирифташуда оид ба тағйирёбии иқлим, гуногунии биологӣ ва дигар соҳаҳои муҳити зист дар вохӯрии Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо Намояндаи доимии Барномаи Рушди Созмони Милали Муттаҳид дар Тоҷикистон Ленни Монтиел дар Душанбе баррасӣ шуданд. Дар ин бора ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Намояндаи доимии Барномаи Рушди СММ дар Тоҷикистон Ленни Монтиел имконоти бузурги Ҷумҳурии Тоҷикистон, бахусус Кумитаи ҳифзи муҳити зисти назди Ҳукумати Ҷумҳурии Тоҷикистонро дар таҳияи лоиҳаҳои нави эҳтимолӣ таъкид намуд.

Инчунин мусоҳибон зимни гуфтушунид оид ба таҳияи лоиҳаҳои нав, иштирок дар ташаббусҳои ояндаи Кумита дар сатҳи миллӣ ва дар сатҳи байналмилалӣ ба тавофуқ расиданд.

АКС: Кумитаи ҳифзи муҳити зисти назди Ҳукумати ҶТ