Дар Вазорати корҳои дохилӣ бо намояндагони «Интерпол» мулоқот доир шуд

ДУШАНБЕ, 16.02.2022 /АМИТ «Ховар»/. 14 феврал муовини Вазири корҳои дохилӣ Саиднахш Раҳмонзода бо ҳайати расмии Созмони байналмилалии полиси ҷиноятӣ «Интерпол» таҳти роҳбарии сардори Раёсат оид ба корҳои глобалӣ ва дастгирии минтақавии «Интерпол» Абдулазиз Убайдулло мулоқот намуд, хабар доданд ба АМИТ «Ховар» дар Вазорати корҳои дохилӣ. 

Зимни мулоқот масъалаҳои васеи густариши ҳамкорӣ миёни Бюрои миллии маркази «Интерпол»-и ВКД Ҷумҳурии Тоҷикистон бо Котиботи генералии «Интерпол» ва масъалаи дастгирии техникии он ҷониб дар ҳалли мушкилоти мавҷудаи мақомот мавриди баррасӣ қарор гирифтанд.

Ҷонибҳо вобаста ба афзоиши хатари терроризм ва экстремизм дар робита ба ҳаводиси Афғонистон ва ҳамчунин хусусияти глобалӣ гирифтани ҷиноятҳои муташаккилона, роҳҳои муборизаи самаранок бо ин зуҳурот ва табодули иттилоот изҳори ақида намуданд.

АКС: ВКД ҶТ