Соли 2021 дар Филиали Донишгоҳи давлатии Москва дар Душанбе 19 шаҳрванди хориҷӣ ба таҳсил фаро гирифта шуданд

ДУШАНБЕ, 16.02.2022 /АМИТ «Ховар»/. Дар Филиали Донишгоҳи давлатии Москва ба номи М.В. Ломоносов дар шаҳри Душанбе дар давраи ҳисоботӣ 19 нафар шаҳрвандони хориҷӣ ба таҳсил фаро гирифта шуданд. Ин нуктаро имрӯз зимни нишасти матбуотӣ директори иҷроияи Филиали Донишгоҳи давлатии Москва дар шаҳри Душанбе Рустам Ғаниев ба рӯзноманигорон хабар дод.

Иттилоъ дода шуд, ки дар давраи комиссияи қабули соли 2021 дар Маркази миллии тестии назди Президенти Ҷумҳурии Тоҷикистон 2421 довталаб барои дохил шудан ба Филиали Донишгоҳи давлатии Москва ба номи М.В. Ломоносов дар шаҳри Душанбе ба қайд гирифта шуданд, ки дар муқоиса бо соли 2020 189 нафар камтар аст (соли 2020 — 2610 довталаб).

Бинобар иҷро нашудани нақшаи қабули донишҷўён роҳбарияти филиал бо ризоияти Вазорати маориф ва илми Ҷумҳурии Тоҷикистон  ва дастгирии бевоситаи роҳбарияти Донишгоҳи давлатии Москва ба номи М.В. Ломоносов қабули иловагии дохилшавандагонро ба гурўҳҳои шартномавӣ эълон кард, ки вобаста ба ин имтиҳоноти дохилшавии иловагӣ бо усули анъанавӣ баргузор шуд. Аз рўйи натиҷаҳои қабули иловагӣ аз тарафи комиссияи қабул ба курси 1-ум ҳамагӣ 35 довталаб қабул шуд, ки аз онҳо 19 нафарашон шаҳрвандони хориҷӣ мебошанд.

Зикр гардид, ки арзёбии сатҳи талабот ҳангоми қабули донишҷўён ва сифати омодагии кадрҳои филиал аз натиҷаҳои интихоби довталабон ба муассисаи таълимӣ вобастагӣ дорад. Бо мақсади ҷалби васеи хатмкунандагони мактабҳо барои дохилшавӣ ба филиал соли 2021 оид ба самтгирии касбӣ кори бонизом ташкил карда шуд.

Дар назди филиал литсей, инчунин курсҳои тайёрӣ (муҳлати таҳсил — 8 моҳ) амал мекунанд, ки дар онҳо омодагии мақсадноки дохилшавандагон бурда мешавад. Аз ҷониби омўзгорони кафедраҳои «Илмҳои бунёдӣ ва табиӣ», «Фанҳои иҷтимоиву гуманитарӣ» ва «Забоншиносӣ» барои дохилшавандагон пайваста дастурҳои методӣ таҳия ва нашр карда мешаванд.

АКСҲО: АМИТ «Ховар»