Ба донишҷӯёни ДОТ дар ноҳияи Рашт муҳтавои муқаррароти қонунгузории Тоҷикистон шарҳ дода шуд

ДУШАНБЕ, 30.03.2022 /АМИТ «Ховар»/. Бо мақсади таъмини иҷрои талаботи “Барномаи таълим ва тарбияи ҳуқуқии шаҳрвандони Ҷумҳурии Тоҷикистон барои солҳои 2020-2030” кормандони Маркази миллии қонунгузорӣ 28-29 март дар доираи сафари хизматӣ бо донишҷӯёни Донишкадаи омӯзгории Тоҷикистон (ДОТ) дар ноҳияи Рашт мулоқот намуданд, хабар доданд ба мухбири АМИТ «Ховар» дар шуъбаи иттилооти ҳуқуқӣ ва мураттабсозии Маркази миллии қонунгузории назди Президенти Ҷумҳурии Тоҷикистон.

Зимни вохӯрӣ аз ҷониби намояндагони Марказ мазмуну муҳтавои муқаррароти қонунгузории Ҷумҳурии Тоҷикистон дар бораи муқовимат ба экстремизм ва терроризм, забони давлатӣ, Конвенсия оид ба ҳуқуқи кӯдак ва дигар масоили ҳуқуқӣ мавриди шарҳу тавзеҳ қарор дода шуд.

Инчунин дар мулоқот аз ҷониби иштирокчиён вобаста ба масъалаҳои мазкур саволу ҷавоб сурат гирифт.

АКС: ММҚ