Гурӯҳи навбатии 110 нафараи шаҳрвандони Тоҷикистон аз Лаҳистон ба Ватан оварда шуд

ДУШАНБЕ, 26.03.2022 /АМИТ «Ховар»/. Субҳи имрӯз гурӯҳи навбатии 110 нафараи шаҳрвандони Тоҷикистон, ки аз қаламрави Украина ба Лаҳистон ворид гардида буданд, тибқи дастури Ҳукумати Ҷумҳурии Тоҷикистон ба Ватан баргардонида шуданд, хабар медиҳад АМИТ «Ховар».

Дар натиҷаи амалӣ намудани ин иқдоми Ҳукумати Ҷумҳурии Тоҷикистон то имрӯз, 26 март 413 нафар шаҳрвандони Тоҷикистон бо шумули занону пиронсолон ва ноболиғон ба Ватан баргардонида шуданд.

Тавре қаблан АМИТ «Ховар» хабар дода буд, 11 март бо ташаббуси Ҳукумати Ҷумҳурии Тоҷикистон ва дар ҳамкорӣ бо мақомоти марбутаи Лаҳистон 303 нафар шаҳрвандони Ҷумҳурии Тоҷикистон, ки аз қаламрави Украина ба ин кишвар рафта буданд, тавассути ширкати лаҳистонии «Enter Air» аз Варшава ба Душанбе оварда шуданд.

Ба шаҳрвандони Ҷумҳурии Тоҷикистон, ки дорои ҳуҷҷати муайянкунандаи шахсият набуданд, аз ҷониби кормандони Сафорат дар фурудгоҳ шаҳодатномаи бозгашт ба Ватан дода шуд.

АКС: бойгонии АМИТ «Ховар»