Тоҷикистон ҳамкориро бо Иттиҳоди байналмилалии ҳифзи табиат тавсеа мебахшад

Март 4, 2022 16:04

ДУШАНБЕ, 04.03.2022/АМИТ «Ховар»/. Масъалаи густариши ҳамкории Тоҷикистон бо Иттиҳоди байналмилалии ҳифзи табиат (ИБҲТ) дар Найробӣ дар меҳвари мулоқоти  Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода ва Директори генералии Иттиҳоди байналхалкии ҳифзи табиат доктор Бруно Оберле  қарор гирифт.

АМИТ  «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад, ки мулоқот дар  ҳошияи иҷлосияи панҷуми Ассамблеяи Барномаи муҳити зисти Созмони Милали Муттаҳид оид ба муҳити зист дар пойтахти Кения- шаҳри Найробӣ доир гардид.

Баҳодур Шерализода ба намояндагони ИБҲТ доир ба самтҳои асосии фаъолияти Кумитаи ҳифзи муҳити зист дар Тоҷикистон маълумот дода, гуфт, ки зарфи 5 соли охир дар кишвар беш аз 9 миллион дарахт шинонида шуда, минтақаҳои табиии махсус ҳифзшаванда аз 2,8 фоизи ҳудуди умумии кишвар дар соли 1991 ба 22 дарсади ҳудуди кишвар то соли 2020 васеъ карда шуданд.

Инчунин зикр гардид, ки дар кишвар барои ҳифз ва зиёд намудани саршумори ҳайвоноти ба Китоби сурхи Тоҷикистон шомилшуда корҳои зиёде ба анҷом расонида шудаанд.

Мусоҳибон ба масъалаҳои марбут ба тавсеаи ҳамкории судманд таваҷҷуҳи махсус зоҳир намуда, самтҳои асосии  фаъолият дар соҳаи ҳифзи табиат, намудҳои нодири ҳайвоноту наботот ва гузаронидани чорабиниҳои муштараки байналмилалӣ бо фондҳои ҷаҳониро матраҳ намуданд.

Доктор Оберле  зикр намуд, ки ИБҲТ ният дорад фаъолияти худро дар Тоҷикистон, аз ҷумла дар соҳаи фаъолияти илмӣ ва нашри муштараки маводи илмии коршиносони ИБҲТ ва мутахассисони тоҷик густариш диҳад.

Баҳодур Шерализода аз доктор Оберле даъват намуд, ки дар доираи чорабиниҳои минтақавии ба нақша гирифташуда дар соли 2022 аз Душанбе боздид намояд.

Иттиҳоди байналмилалии ҳифзи табиат (ИБҲТ — IUCN) созмони байналмилалии ғайритиҷоратӣ буда, мушкилоти ҳифзи гуногунии биологии сайёраро инъикос мекунад, хабарҳо, конгрессҳои дар кишварҳои гуногун баргузоршуда, рӯйхати намудҳоеро, ки ба ҳифзи махсус ниёз доранд, пешкаш менамояд. Ин созмон дар Маҷмаи Умумии СММ мақоми нозир дорад.

Иттиҳодия дар татбиқи якчанд конвенцияҳои байналмилалӣ оид ба ҳифзи табиат ва гуногунии биологӣ нақши калон мебозад. Ҳамзамон дар таъсиси Хазинаи ҷаҳонии табиат ва Маркази ҷаҳонии мониторинги ҳифзи табиат иштирок намудааст.

 

АКСҲО: Кумитаи ҳифзи муҳити зисти назди Ҳукумати ҶТ

Март 4, 2022 16:04

Хабарҳои дигари ин бахш

Давлатҳои аъзои СҲИ барои иштирок дар Конфронси навбатии байналмилалии сатҳи баланди «Раванди Душанбе» даъват шуданд
Сироҷиддин Муҳриддин дар Ҷаласаи ғайрирасмии вазирони корҳои хориҷии кишварҳои узви Созмони ҳамкории иқтисодӣ иштирок намуд
Ҳайати Тоҷикистон дар Ҷаласаи солонаи вазирони корҳои хориҷии Гурӯҳи 77 ва Чин иштирок кард
Тоҷикистон ва Гвинея-Бисау муносибатҳои дипломатӣ барқарор намуданд
Дар Ню-Йорк нишасти вазирони корҳои хориҷии Осиёи Марказӣ ва Иёлоти Муттаҳидаи Амрико доир шуд
Тоҷикистон ва Арабистони Саудӣ талаботи раводид барои дорандагони шиносномаҳои дипломатӣ ва хизматиро бекор менамоянд
Сироҷиддин Муҳриддин дар нишасти солонаи Гурӯҳи кишварҳои тараққикунандаи маҳсур дар хушкӣ дар Ню-Йорк иштирок намуд
Дар Москва бо тоҷикони муқими Русия мулоқот доир шуд
Дар Ню-Йорк ҷаласаи ғайринавбатии Шурои вазирони корҳои хориҷии СААД баргузор гардид
Тоҷикистон ва Намибия муносибатҳои дипломатӣ барқарор намуданд
Бонки ҷаҳонӣ дар таҳияи мундариҷавии Конфронси байналмилалӣ оид ба ҳифзи пиряхҳо саҳм мегузорад
Рӯзи Истиқлоли давлатӣ ва 30-солагии Конститутсияи Тоҷикистон дар шаҳри Риёз таҷлил карда шуд