Дар барномаи «Набзи иқтисод»-и Радиои «Ховар» масъалаи истифодаи самараноки замин ва мушкилоти хоҷагидорон баррасӣ мешавад

ДУШАНБЕ, 29.04.2022. /АМИТ «Ховар»/. Кишоварзӣ соҳаи муҳими иқтисоди миллӣ ба ҳисоб рафта, яке аз ҳадафҳои стратегии кишвар – таъмини амнияти озуқаворӣ маҳз ба пешрафти он  вобастагӣ дорад. Буҳронҳои иқтисодие, ки чанд соли охир ҷомеаи ҷаҳонро хеле ба танг овардаанд, масъалаи дастрасӣ ба маводи озуқавориро рӯз аз рӯз душвортар месозанд. Роҳи ягонаи раҳоӣ аз он- истифодаи оқилонаи ҳар ваҷаб замин, гирифтани ду-се ҳосил ва захираи маводи хӯрокворӣ арзёбӣ мешавад, ки масъалаи мазкур зери таваҷҷуҳи роҳбарияти мамлакат қарор дорад.

Коршиносон мегӯянд, ки барои самаранок истифода бурдани замину гирифтани ду-се ҳосил тарзи дурусти истифода ва ҷобаҷогузории зироат хеле муҳим аст.

Маҳз талошу заҳмати марди деҳқон аст, ки новобаста аз вазъи мураккаби ҷаҳони муосир бозорҳои мамлакат фаровону арзиши маҳсулоти мавриди ниёзи аввал нисбат ба чанд соли охир арзону дастрас мебошад.

Оё имрӯз заминҳои қобили кишт то куҷо самараноку мақсаднок истифода мешаванд? Коршиносон мегӯянд, ки вобаста ба болоравии арзиши рекордии нуриҳои минералӣ ва сӯзишворӣ ҳосили имсола кам хоҳад буд. Мутахассисони соҳа бар ин назаранд, ки ба ҷойи нуриҳои минералӣ деҳқонони мо бояд аз поруҳои маҳалӣ ё худ роҳи алтернативии нуриҳо истифода кунанд.

Шарҳи пурраи ин мавзӯъро  барномаи таҳлилии «Набзи иқтисод» дар пешниҳоди коршиносону мутахассисон пайгирӣ намудааст, ки  29 апрел, соати 08-30 ва такроран 17:30, 21:30 дар таҳияи муаллиф ва муҳаррири барнома Абдураҳими Абдуқаҳҳор аз Радиои «Ховар» пахш  мешавад.

АКС: АМИТ «Ховар»