Охири моҳи апрел ва аввали май Тоҷикистонро ҳавои номусоид интизор аст. Таъсири он ба соҳаи кишоварзӣ чӣ гуна аст?

Апрель 22, 2022 10:05

ДУШАНБЕ, 22.04.2022 /АМИТ «Ховар»/. Дар охири моҳи апрел ва аввали моҳи май дар ҷумҳурӣ ҳавои номусоид пешгӯӣ мешавад. Аз 24 то 29 апрел борони кӯтоҳмуддат борида, раъду барқ ​​ба амал меояд. Дар ноҳияҳои кӯҳӣ боридани жола дар назар аст. 4-5 май боридани борони кӯтоҳмуддат ва раъду барқ ​​пешгӯӣ мешавад, иттилоъ дод ба АМИТ «Ховар» сардори Раёсати пешгӯии обуҳавошиносии Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Саттор Саидов.

«Дар ин рӯзҳо дар вилояти Хатлон тӯфони чангу ғубор ва фаромадани тормеғ пешгӯӣ шуда, ҳарорати ҳаво дар водиҳо аз 5 то 10 дараҷа гарм мешавад. Дар даҳаи аввали моҳи май ҳарорати ҳаво шабона ва рӯзона баланд мешавад. Охири моҳи апрел дар водиҳо рӯзона 25+30 дараҷа гарм ва дар аввали моҳи май 30+35 дараҷа гарм мешавад, ки ин ба ноҳияҳои кӯҳӣ дахл дорад», — гуфт манбаъ.

Дар охири моҳи апрел дар шарқи ВМКБ ҳаво аз 2-7 то 0-5 дараҷа хунук мешавад.

Бино ба гуфти мавсуф, дар дигар ноҳияҳои кӯҳӣ ва навоҳии тобеи марказ рӯзона то 20 дараҷа гармӣ пешбинӣ шудааст. Аввали моҳи май дар ноҳияҳои кӯҳӣ то 25 дараҷа гармӣ дар назар аст. Дар охири моҳи апрел ва аввали моҳи май дар шаҳри Душанбе низ ҳавои номусоид пешбинӣ мешавад. Дар баъзе рӯзҳо дар водиҳо борони кӯтоҳмуддат дар назар буда, раъду барқ ба амал меояд.

Дар вилояти Хатлон моҳи май ҳаво аз меъёр 1-2 дараҷа гарм шуда, дар водиҳо 20+25 дараҷа гарм, дар доманакӯҳҳо 17+18 дараҷа гарм мешавад. Интизор меравад, ки моҳи май ҳарорати ҳавои атмосферӣ дар водиҳо рӯзона аз 27 то 32+37 дараҷа гарм ва шабона то 12+17 дараҷа гарм шавад. Давоми моҳ ҳаво камабр шуда, баъзан бориши борони шиддатнокиаш гуногун, раъду барқ ​​ва жола дар назар аст.

Дар вилояти Суғд ҳавои миёнаи моҳона аз меъёри иқлимӣ 1 дараҷа гарм- дар водиҳо 22+23, дар ноҳияҳои кӯҳӣ 10+13 дараҷа гарм пешбинӣ шудааст.

Давоми моҳи май дар ҷумҳурӣ ҳавои камабр боқӣ монда, баъзан борони шиддатнок, раъду барқ ​​ва жола меборад.

Вобаста ба вазъи номусоиди ҳаво дар охири моҳи апрел ва аввали моҳи май Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз тамоми сокинони мамлакат хоҳиш мекунад, ки то ҳадди имкон дар чунни рӯзҳо аз сафар аз ағбаҳо ва роҳҳои кӯҳӣ, сайругашт дар кӯҳҳо, чидани занбурӯғ, гиёҳҳои шифобахш, ҳезум, моҳидорӣ ва шикор худдорӣ намоянд

Ҳамчунин ба хотири пешгирии оқибатҳои сел аз сокинон хоҳиш мешавад, ки тамоми ҷӯйбору заҳбурҳои назди манзили зисташонро тоза кунанд.

Кумита ба хотири пешгирии садама дар роҳҳо, бахусус ҳангоми истифода аз роҳҳои кӯҳӣ ва ағбаҳо аз ронандагон хоҳиш мекунад, ки ҳаракати шабонаро маҳдуд созанд, қоидаҳои ҳаракат дар роҳ ва муҳимтар аз ҳама, меъёри суръатро риоя кунанд.

Дотсенти кафедраи пахтапарварӣ, генетика, селексия ва тухмипарварии Донишгоҳи аграрии Тоҷикистон ба номи Шириншоҳ Шоҳтемур Зикриёхон Ҳайдаров иброз дошт, ки вазъи ҳавои пешгӯишуда ба самти пахтапарварӣ фоидабахш аст. Зеро пунбадонае, ки аллакай дар заминҳо кишт шудааст, бо боридани борон бо намӣ таъмин шуда, пурра неш зада мебарояд. Дар ин сурат кори марди деҳқон осон шуда, аз обмонии зиёдатӣ худдорӣ мекунад.

Мавсуф зикр намуд, ки баъд аз боридани борон дар баъзе ноҳияҳои пахтакори мамлакат намӣ зиёд шуда, сафолакҳо пайдо мешаванд. Бояд гуфт, ки хоки мо бештар хусусияти сафолакбандӣ дорад. Ин раванд имконияти неш зада баромадани чигитро маҳдуд мекунад. Барои ин коркарди фаврии рӯякӣ пеш меояд, ки мо бояд корҳои сафолакшиканӣ гузаронида, имконияти аз замин неш зада баромадани чигитро таъмин намоем.

«Як қисми кишоварзони мо аз тухмии лучаки чигит истифода карда, онро бо меъёри аз 25 то 30 килограмм дар 1 гектар сарф кардаанд. Дар ин ҳолат агар онҳо сафолакҳоро нашикананд, имконияти аз замин неш зада баромадани чигите, ки бо меъёри як ё ду дона дар як лона афтидааст, маҳдуд мегардад»,- гуфт ҳамсуҳбати мо.

Ба гуфти олимони соҳаи кишоварзӣ, ваъзи номусоиди ҳаво ва меъёри пешгӯишуда ба соҳаи боғу токпарварӣ чандон зарари зиёд надорад. Зеро дар бештари ноҳияҳои мамлакат дар айни ҳол дарахтон ғурра бастаанд. Агар меъёри ҳаво аз 5 дараҷа хунук нагардад, ҳеҷ зиёне ба вуҷуд намеорад. Ин вазъи ҳавои пешгӯишуда барои якчанд ноҳияи мамлакат, ки дарахтони онҳо ба намӣ ниёзи бештар доранд, имконияти хубест.

АКС: АМИТ «Ховар»

Апрель 22, 2022 10:05

Хабарҳои дигари ин бахш

Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд
Ҳайати Тоҷикистон дар ҷаласаи коршиносони байналмилалӣ дар Истанбул иштирок намуд
«МАКТАБИ СИЁСИИ ПЕШВОИ МИЛЛАТ». Назаре ба кори Конференсияи байналмилалии илмию амалӣ бахшида ба 25-солагии Ваҳдати миллӣ
Шабнам Раҳимзода, муовини якуми Раиси Кумитаи кор бо ҷавонон ва варзиш: «Ваҳдати миллӣ табассуми гумшудаи модари тоҷикро дубора баргардонд»
Раиси КИ ҲХДТ дар ноҳияи Фирдавсӣ: «Аз заиф будани ваҳдати миллӣ дар Афғонистон зиёда аз чор даҳсола аст, ки онҳо ба сулҳу субот намерасанд»
АГЕНТИИ ОБУҲАВОШИНОСӢ ХАБАР МЕДИҲАД: Аз 27 то 30 июн дар Тоҷикистон ҳарорати рӯзонаи ҳаво баланд мешавад
Дар шаҳри Гулистон таҳти унвони «Эмомалӣ Раҳмон – меъмори давлати миллии тоҷикон» конференсия доир шуд
«Ба қадри сулҳу оромии Тоҷикистон бирасем!»,- бардошт аз конференсия дар Кумитаи забон ва истилоҳот
ҲХДТ бахшида ба 25-солагии Рўзи Ваҳдати миллӣ дар Бохтар Конфронси байналмилалии илмӣ-амалӣ доир намуд
Дар Душанбе Фестивал-намоиши «Таомҳои миллӣ» баргузор гардид